जेली चॉकलेट बाळाच्या घशात अडकलं, आईनं प्रयत्नांची शर्थ केली, पण जे व्हायला नको तेच घडलं

रत्नागिरी: न कळत्या वयातील लहान मुलांची काळजी घेणं हे आवश्यक असतं, त्याकडे जराही दुर्लक्ष झाल्यास ते जीवावर बेतू शकतं. असाच एक दुर्दैवी प्रकार कोकणातील रत्नागिरी जिल्ह्यातील गुहागर तालुक्यात घडला आहे. गुहागर तालुक्यात साखरी आगरी येथे अवघ्या एका नऊ महिन्याच्या बाळाचा घशात जेली चॉकलेट अडकून दुर्दैवी मृत्यू झाला आहे.

जेली चॉकलेट हे या बाळाने उचलून तोंडात घातले आणि ते चघळत असतानाच काही वेळाने हे चॉकलेट या बाळाच्या गळ्यात अडकलं. त्यामुळे त्याचा श्वास घेण्यास त्रास होऊ लागला. ते अस्वस्थ झाले ही बाब त्याच्या आईच्या तात्काळ लक्षात आली. त्यांनी शेजाऱ्यांच्या मदतीने त्याला गुहागर ग्रामीण रुग्णालयात दाखल केले. मात्र, तत्पूर्वीच दुर्दैवाने त्याची प्राणज्योत मालवली होती. गुहागर तालुक्यातील साखरी आगर येथील रिहांश तेरेकर असे या बाळाचे नाव आहे. या मुलाचे वडील हे कामानिमित्त मुंबई येथे असतात, तर आई गृहिणी आहे. आजी-आजोबा आणि आई असं कुटूंब गुहागर तालुक्यात आपल्या गावी साखरी आगर येथे वास्तव्यास आहे.

हेही वाचा -आनंद मठ ही ओळख इतिहासजमा होणार, बाळासाहेबांची शिवसेना आनंद आश्रम असं नवं नाव, ठाण्यात चर्चा सुरु

जेली चॉकलेट अडकूनन या नऊ महिन्याच्या बाळाचा मृत्यू झाल्याचा प्रकार गुहागर पोलिसांना समजताच वावर पोलिसांनी तात्काळ हॉस्पिटलमध्ये धाव घेतली. गुहागरचे सहाय्यक निरीक्षक पवन कांबळे उपनिरीक्षक आनंदराव पवार, पोलीस हवालदार स्वप्नील शिवलकर आदींनी घटनास्थळी येऊन पंचनामा केला.

नऊ महिन्याच्या सुंदर बाळाचा दुर्दैवी झालेला मृत्यू पाहून पोलिसांच्याही डोळ्याच्या कडा पाणवल्या. यावेळी या बाळाच्या आईने केलेला आक्रोश हा हृदय पिळवटून टाकणारा होता. न कळत्या वयातील लहान मुलांच्या हालचालींवर काळजीपूर्वक लक्ष ठेवणे आवश्यक आहे, हेच या घटनेवरून अधोरेखित झालं आहे. या सर्व घटनेची नोंद गुहागर पोलीस ठाण्यात करण्यात आली असून अधिक तपास गुहागर पोलीस ठाण्याचे सहाय्यक निरीक्षक पवन कांबळे करत आहेत.

हेही वाचा -सखूबाईच्या धाडसाने कुटुंब सलामत, अंबरनाथमध्ये बिबट्याचा हल्ला महिलेने परतवला