Tej Police Times
मुंबई : गेल्या काही वर्षांत आगीच्या घटनांमध्ये वाढ झाली आहे. विशेषतः बहुमजली इमारतींत आगीच्या घटना वाढत आहेत. या पार्श्वभूमीवर मुंबई अग्निशमन दलाने गेल्या महिन्यात १४७ इमारतींच्या केलेल्या पाहणीत तब्बल ६३ इमारतींमध्ये अग्निशमन यंत्रणा ठप्प असल्याचे आढळून आले. इमारतींमध्ये अग्निशमन यंत्रणा बसविण्यासाठी या इमारतींना नोटिसा बजावण्यात आल्या आहेत. विहित मुदतीत सुधारणा न झाल्यास कारवाईचा बडगा उगारला जाणार असल्याचे अग्निशमन दलाने म्हटले आहे.
गेल्या वर्षभरात लालबाग येथील वन अविघ्न पार्क टॉवरमध्ये दोन वेळा आग लागली. टॉवरमध्ये अग्निशमन यंत्रणा सुरू असल्याने आग वेळेत आटोक्यात आणणे अग्निशमन दलाला शक्य झाले. या पाठोपाठ कांदिवली, बोरिवली, वरळी, वडाळा यासह विविध भागांत आगी लागण्याच्या घटना घडल्या आहेत. या पार्श्वभूमीवर अग्निशमन दलातर्फे डिसेंबरमध्ये दोनवेळा सुमारे १४७ इमारतींमध्ये अचानक तपासणी करण्यात आली. बहुसंख्य इमारतींमध्ये सदोष इलेक्ट्रिक वायरिंगमुळे आगीच्या दुर्घटना घडत असल्याचे निदर्शनास आले आहे.
अग्निशमन दलाने नोटीस बजावल्यानंतर ६०, ९० व १२० दिवसांत अग्निसुरक्षा यंत्रणा कार्यान्वित करण्याची मुदत दिली जाते. या मुदतीत सुधारणा न झाल्यास वीज व जलजोडणी खंडित करण्याचा इशारा मुंबई अग्निशमन दलाने दिला आहे. ८० टक्के आगीच्या घटना सदोष वायरिंगमुळे लागत असल्याने घर, कार्यालये किंवा हॉटेल, रेस्टॉरंटमध्ये सजावटीसाठी ज्वलनशील पदार्थांचा वापर करू नये, असे आवाहन अग्निशमन दलाने केले आहे.
पाहणी आणि नोटिसा
२ डिसेंबर २०२२
९८ सोसायट्यांची तपासणी
४० इमारतींना नोटीस
२८ डिसेंबर २०२२
५९ इमारतींची झाडाझडती
२३ इमारतींना नोटिसा
अग्निशमन कायदा २००६ नुसार कारवाई
कलम ८१ (१) : नोटीस दिली जाते
८२ (२) : वीज, जलजोडणी कापण्याचा इशारा
८३ (३) संबंधित आस्थापना सील करण्यात येते