Tej Police Times
मुंबई- राखी सावंतची आई जया सावंत यांचं प्रदीर्घ आजाराने आज रात्री ८ वाजून ३२ मिनिटांनी निधन झालं. गेल्या अनेक दिवसांपासून त्या ब्रेन ट्युमर आजारावर उपचार घेत होत्या. अखेर आज जुहू येथील सिटीकेअर रुग्णालयात राखीच्या आईने अखेरचा श्वास घेतला. आईच्या अखेरच्या क्षणांमध्ये राखी आईसोबतच होती. आईच्या निधनाने राखी पूर्णपणे तुटली आहे. जेव्हापासून राखीला समज आली तिने एकटीने संपूर्ण घर सांभाळलं. तसेच राखीच्या प्रवासात तिच्या आईने शेवटपर्यंत तिला साथ दिली. राखीनेही आपल्या आईची साथ कधीही सोडली नाही.
आता राखीचा आईची काळजी करणारा एक व्हिडिओ सोशल मीडियावर व्हायरल होत आहे. बिग बॉस १४ मधील हा व्हिडिओ आहे. घरातील स्पर्धकांना त्यांचे कुटुंबिय भेटायला आले होते. यावेळी प्रत्येक स्पर्धकाचा नातेवाईक त्यांना भेटून गेला. फक्त राखीच्या घरून कोणीच आलं नाही. अखेर राखीच्या आईचा एक व्हिडिओ बिग बॉसच्या घरात दाखवण्यात आला. यावेळी आईला आजारपणामुळे रुग्णालयात भरती केल्याचं राखीला कळलं. यानंतर आईच्या काळजीत राखी प्रचंड रडायला लागली.
आईच्या काळजीपोटी राखी पूर्णपणे तुटली आणि तिला काळजी घ्यायला सांगितली. ‘आई मी घरातून बाहेर येईपर्यंत स्वतःची काळजी घे. मी तुझ्यासाठी उपवास करेन. तुला काही होणार नाही ना आई.. मी तुझ्याशिवाय राहू शकत नाही.. तू स्वतःची काळजी घे. मला तुझ्याशिवाय कोणीच नाही.’ अशी विनवणी राखी आईला सतत करत होती. एरव्ही सगळ्यांसमोर निर्भिडपणे बोलणारी राखी यावेळी मात्र आईच्या काळजीने पूर्णपणे कोलमडून गेली होती.
२०२१ मध्ये करण्यात आलेले यशस्वी ऑपरेशन
राखी सावंतच्या आईचे एप्रिल २०२१ मध्ये कॅन्सरचे यशस्वी ऑपरेशन झाले होते. आईच्या यशस्वी ऑपरेशननंतर राखीने सलमान खान आणि सोहेल खान यांचे आभार मानले होते. त्यांनी राखीच्या आईच्या उपचाराचा खर्च उचलण्यास मदत केली होती.