किती ते प्लॅनिंग! खोटं होतं प्रियांका- शिवचं भांडण? रात्रीच्या प्लॅनिंगचा व्हिडिओ झाला व्हायरल

मुंबई- ‘बिग बॉस १६’ च्या फिनालेच्या काही दिवस आधी टीना दत्ता कमी मतांमुळे घराबाहेर पडली. येत्या काही दिवसांत आणखी एक स्पर्धक घराबाहेर जाईल. टीना घरातून गेल्यानंतर आता बिग बॉसच्या घरात फक्त सात स्पर्धक उरले आहेत. अंतिम फेरीत फक्त सहा स्पर्धकांचा सहभाग असल्याचं सध्यातरी बोललं जात आहे. अशात येत्या आठवड्यात अजून एक स्पर्धक घराबाहेर पडेल हे निश्चितच आहे.

टीना गेल्यानंतर प्रियांका आणि अर्चना पुर्णपणे ‘मंडळी’ विरुद्ध उभ्या राहिल्या आहेत. आतापर्यंत टीना आणि प्रियांका मिळून शालीनला टार्गेट करत होत्या. त्यामुळे ‘फ्रायडे का वार’मध्ये दोघांना फराह खानने चांगलेच फटकारले होते. पण आता आगामी भागात अर्चना आणि प्रियांका यांच्यात शिव-एमसी स्टॅनमध्ये जोरदार भांडण होताना दिसणार आहे.

कालच्या भागात अर्चना गौतम, शिव आणि एमसी स्टेनला चिथावताना दिसते. यात प्रियांका चहर चौधरीदेखील उडी मारते आणि ‘मंडळी’वर कमेंट करू लागते. यावर एमसी स्टॅन चिडतो आणि प्रियांका-अर्चनाला सांगतो की लोकांची दिशाभूल करण्याचा प्रयत्न करू नका. अर्चना स्टॅनला टोमणा मारत म्हणते की, तुला काही स्वाभिमान वगैरे आहे की नाही? त्यावर शिव उत्तर देताना म्हणतो की, ‘बघा कोण स्वाभिमानाबद्दल बोलत आहे. जे स्वतः स्वाभिमान विकून आलेत?’

शिवकडून कोणतीही प्रतिक्रिया मिळाली नाही हे पाहून स्टॅनवर साधला निशाणा

अर्चनाला शिवकडून अपेक्षित अशी प्रतिक्रिया मिळत नसल्याचं पाहून तिने एमसी स्टॅनशी भांडायला सुरुवात केली. साजिद खानमुळेच तू इथपर्यंत आला अशी बोचरी टीका तिने केली. यानंतर दोघांमधील भांडण वाढत जातं. या भांडणात प्रियांका मध्ये पडते आणि स्टेनला सुनावते. ही त्याची आणि शिवची घाणेरडी खेळी असल्याचं ती बोलते.

रात्रीच्या प्लॅनिंगचा व्हिडिओ व्हायरल

दरम्यान, ट्विटरवर एक व्हिडिओ व्हायरल होत आहे, ज्यामध्ये प्रियांका आणि अर्चना भांडणाचं प्लॅनिंग करताना दिसत आहेत. रात्री झोपताना अर्चना आणि प्रियांका शिव आणि एमसी स्टॅनला कसं कचाट्यात पकडता येईल याचं नियोजन करताना दिसले. व्हायरल व्हिडिओमध्ये अर्चना प्रियांकाला म्हणते की, ‘ऐक ना, उद्या यांना माझी शायरी ऐकवून डिवचू का? जिम करताना तुला ऐकवेन. मग आपण त्यांना चिडवूया आणि नाचूया.. मजा येईल. नको राहू दे उगाच प्रकरण वाढेल आणि आपलीच शाळा घेतली जाईल.’

हा व्हिडिओ पाहून चाहत्यांना धक्का बसला. त्यांनी सोशल मीडियावर अर्चना आणि प्रियांकाला फटकारायला सुरुवात केली. एका युझरने लिहिले की, ‘त्यांचं प्लॅनिंग पाहा. मग म्हणतील शिव सैरभैर झालाय. सर्वांचं प्लॅनिंग शिवच्याच विरोधात आहे.’ आणखी एका युझरने ट्वीट करत म्हटले की, ‘हा पहिला सीझन आहे ज्यामध्ये एवढी वाईट मुलगी आली आहे. प्रियांका आणि अर्चना यांची मागील सीझनमधील स्पर्धकांशी तुलनादेखील करू नका.’