अय्यो! ज्याच्यासोबत अफेअरच्या चर्चा त्याचाही आजच वाढदिवस; सायलीचे फोटो व्हायरल

मुंबई- आपल्या अभिनयाने आणि सौंदर्याने प्रेक्षकांच्या मनावर राज्य करणारी लोकप्रिय अभिनेत्री सायली संजीव हिचा आज ३१ जानेवारी रोजी वाढदिवस आहे. सायली आज तिचा २९ वा जन्मदिन साजरा करत आहे. सायली तिच्या ‘काहे दिया परदेस’ मालिकेतून घराघरात पोहोचली. या मालिकेतील आपल्या भूमिकेने तिने प्रेक्षकांच्या मनावर राज्य केलं. आज वाढदिवसाला सायलीने तिचे काही फोटो चाहत्यांसोबत शेअर केले आहेत. या फोटोंमध्ये ती केक कापताना दिसतेय. मात्र आज आणखी एका गोष्टीमुळे सायली चाहत्यांमध्ये चर्चेत आहे. आज ३१ जानेवारी रोजी आणखी एका व्यक्तीचा वाढदिवस आहे ज्याच्यासोबत सायलीच्या अफेअरच्या चर्चा रंगल्या होत्या. त्यामुळे सायलीने केलेलं सेलिब्रेशन नक्की कुणासाठी होतं असंही नेटकरी म्हणत आहेत.

सायली आणि भारतीय क्रिकेटपटू ऋतुराज गायकवाड यांच्या अफेअरच्या चर्चा अनेकदा सोशल मीडियावर ऐकायला मिळतात. मध्यंतरी सायली आणि ऋतुराज एकमेकांना डेट करत असल्याच्या चर्चा चाहत्यांमध्ये होत्या. त्यावर सायलीला विचारणा करण्यात आल्यावर तिने तो आपल्यापेक्षा लहान असल्याचं म्हटलं होतं. सोबतच आपण अनेक क्रिकेटपटूंना फॉलो करत असून त्यात ऋतुराजही असल्याचं म्हटलं होतं. मात्र आपलं त्याच्यासोबत अफेअर असल्याचं तिने नाकारलं होतं. मात्र आज सायलीच्या वाढदिवसाच्या दिवशीच ऋतुराजचा देखील वाढदिवस आहे. त्यामुळे सोशल मीडियावर एकच चर्चा आहे. सायलीने रात्री १२ वाजता तिच्या वाढदिवसाचं सेलिब्रेशन केलं आहे. तिने रात्री आपल्या कुटुंबासोबत केक कापतानाचे फोटो चाहत्यांसोबत शेअर केले आहेत. ते फोटोही आता नेटकऱ्यांमध्ये व्हायरल झाले आहेत.

ऋतुराजच्या चाहत्यांमध्येही सायलीच्या सेलिब्रेशनचे फोटो व्हायरल झाले आहेत. सायली आणि ऋतुराज एकमेकांना डेट करत असलेल्या चर्चांवर जोर धरला असताना सायली म्हणाली होती, ‘आम्ही फक्त मित्र होतो. आता मैत्रीच्या नात्यातही दुरावा निर्माण झाला आहे. आमच्या नात्याबद्दल जेव्हा बोललं जाऊ लागलं तेव्हा त्याचा परिणाम आमच्या मैत्रीवर झाला. आता आम्ही मित्रासारखं बोलूही शकत नाही. आम्ही सुरुवातीला बोलायचो पण आमच्यात आता बोलणं होतं नाही.’