एक आदर्श असाही! ‘तू चाल पुढं’मधील अश्विनीकडून प्रेरणा घेत तिने उघडलं स्वतःचं पार्लर; म्हणते-

मुंबई- छोट्या पडद्यावरील मालिका या प्रेक्षकांच्या जिव्हाळ्याचा विषय मात्र काही प्रेक्षक मालिकांना नावं ठेवताना दिसतात. मालिका प्रेक्षकांच्या मनोरंजनासाठी असतात मात्र त्यात दाखवण्यात येणारी कारस्थानं आणि भांडणं काही प्रेक्षकांना मुळीच आवडत नाहीत त्यामुळे ते सतत मालिकांना नावं ठेवताना दिसतात. मात्र या मालिकांमधून आपण काय घ्यायचं हे केवळ आपण ठरवायचं असतं. अशाच एका मालिकेतील पात्रापासून आदर्श घेत एका महिलेने स्वतःचं काम सुरू केलं आहे आणि स्वतःच्या पायावर उभी राहीली आहे. ‘तू चाल पुढं’ या झी मराठीवरील मालिकेतील अश्विनीचा आदर्श घेत एका सर्वसामान्य गृहिणीने स्वतःचं पार्लर सुरू केलं आहे. महत्वाचं म्हणजे त्या गृहिणीचं नावदेखील अश्विनी आहे. तिने एक कमेंट करत आपल्या प्रवासाबद्दल सांगितलं.

मालिकेतील अश्विनीपासून प्रेरणा घेण्याबद्दल बोलताना अश्विनी म्हणाली, ‘मी सांगू इच्छिते की जेव्हा ही मालिका सुरू झाली तेव्हा मी पार्लरचा क्लास करत होते. माझंही नाव अश्विनी असल्याने मालिकेतील अश्विनीही मला खूप आवडायची. या मालिकेतील अश्विनीकडून मी खूप काही घेतलं. माझंही आयुष्य थोड्याफार प्रमाणात असंच. कधीतरी मी मालिका पाहून पाहून खूप रडायचे, तिच्याजागी स्वतःला बघायचे. पण आता काहीतरी करायचंच असं मनाशी ठरवून तू चाल पुढं असा निर्णय मी घेतला. ही मालिका पाहून अश्विनीकडून मला इतका आत्मविश्वास मिळाला की मी सहा महिन्यात संपूर्ण कोर्स करून आपल्या पायावर उभी राहिले.’

तिने पुढे लिहिलं, ‘मी शून्यातून विश्व निर्माण केलं आणि मला त्याचा खूप अभिमान आहे. मी योग्य वेळी योग्य व्यक्तीकडून खूप काही शिकले. आज माझंही अश्विनी ब्यूटी पार्लर आहे. याचं सर्व श्रेय दीपा चौधरी आणि झी मराठी यांना जातं. त्यांच्यामुळे मी आज इथवर येऊ शकले.’ तिची पोस्ट झी वाहिनीने देखील त्यांच्या इन्स्टाग्राम अकाउंटवर शेअर केली आहे. सोबतच आम्ही फक्त तुम्हाला तू चाल पुढं असंच म्हणत राहू असंही म्हटलं आहे.