Tej Police Times
मुंबई: रॅप गायक एमसी स्टॅन सध्या चर्चेत आहे. सध्या तो बिग बॉस हिंदीच्या १६ व्या पर्वात स्पर्धक म्हणून सहभागी झालाय. त्यानं या गेममध्ये मोठा टप्पा गाठला. त्याचं एकूणच व्यक्तिमत्व चाहत्यांना आवडलं. त्याचा चाहतावर्ग प्रचंड वाढलाय. इतकंच नव्हे तर त्याच्या हटके स्टाइलची अनेकदा चर्चा होताना दिसतेय.
एमसी स्टॅनच्या फॅशनलेबल आणि हटके कपड्यांसोबतच त्याचे डायलॉग्जही व्हायरल होत असतात. त्याचे डायलॉग्ज अनेकदा सोशल मीडियावर व्हायरल झाले आहेत.
लग्झरी लाइफस्टाइल
एमसी स्टॅनला अलिशान आयुष्य जगायला आवडतं. महागडे कपडे, गाड्या, शूज यांची त्याच्याकडं कमी नाही. अनेकदा त्याच्या कपड्याच्या , बुटाच्या किंमतींची चर्चा झाली आहे. चाहत्यांना त्याची लग्झरी लाइफस्टाइलही आवडतेय.
‘टोपी’ची किंमत आहे तरी किती?
बिग बॉसच्या घरात एमसी स्टॅन नेहमीच महागड्या कपड्यांमध्येच दिसून आला आहे. नुकत्याच दाखवण्यात आलेल्या एका भागात त्याच्या टोक्यावरच्या टोपीनं सगळ्याचं लक्ष वेधलं. ही काय साधी सुधी टोपी नाहीये. दिसायला साधी दिसत असली तरी या काळ्या रंगाच्या टोपीची किंमत तब्बल हजारोंमध्ये आहे. बॅलेंसियागा (Balenciaga) या लोकप्रिय ब्रॅंडची ही टोपी आहे. या टोपीची किंमत तब्बल ३० हजार रुपये असल्याचं म्हटलं जात आहे.
कोण आहे एमसी स्टॅन?
एमसी स्टॅन हा रॅपर आहे. पुण्यात जन्मलेल्या या रॅपरचं खरं नाव अल्ताफ असं आहे. रॅपच्या क्षेत्रात आल्यानंतर आणि आयुष्यात घडलेल्या चांगल्या वाईट-गोष्टींमुळं त्यानं त्याचं नाव एमसी स्टॅन असं ठेवलं. पुण्याच्या एका वस्तीतून त्याचा सुरू झालेला प्रवास आता बिग बॉसच्या घरापर्यंत पोहोचलाय. एमसी स्टॅन सोशल मीडियावर देखील प्रचंड चर्चेत असतो. त्याच्या लाईव्ह शोंना तरुणाई गर्दी करताना दिसते.