लोकलमधील मोटरमन चक्कर येऊन केबिनमध्येच पडला; मालाड स्थानकातील घटनेमुळे उलटसुलट चर्चा

मुंबई : चर्चगेट ते बोरिवली या मार्गस्थ लोकलमधील मोटरमन भोवळ आल्याने मोटरमन केबिनमध्ये पडल्याचा धक्कादायक प्रकार मंगळवारी घडला. मनीष कुमार असे या मोटरमनचे नाव आहे. लोकल मालाड स्थानकात आल्यावर हा प्रकार घडल्याने मोठा अपघात टळला आहे. दरम्यान कामाचा ताण असल्याने आजारी असतानाही कामावर उपस्थित असल्याने हा प्रकार घडला, अशी चर्चा रेल्वे अधिकाऱ्यांमध्ये सुरू आहे.

मालगाड्यामध्ये लोको पायलट म्हणून मनीष कुमार कार्यरत होते. २४ जानेवारीला मोटरमन म्हणून त्यांची नियुक्ती करण्यात आलेली होती. मोटरमनपदी नियुक्त झाल्यापासून त्यांच्या प्रकृतीत अस्वस्थता जाणवत होती, असे रेल्वे अधिकाऱ्यांनी सांगितले.

३१ जानेवारी रोजी दुपारी अडीच वाजण्याच्या चर्चगेटहून धीम्या मार्गावरून बोरिवलीच्या दिशेने लोकल रवाना झाली. लोकल साडेतीनच्या सुमारास मालाड स्थानकात थांबली. यावेळी मोटरमन यांना चक्कर आल्याने ते केबिनमध्येच कोसळले. लोकलच्या गार्डने हा प्रकार उघडकीस आणताच तातडीने रेल्वे स्थानकातील वैद्यकीय पथकाने त्यांची तपासणी केली. रक्तदाब कमी झाल्याने त्यांना चक्कर येऊन ते कोसळल्याचे डॉक्टरांनी स्पष्ट केले. चौकशीअंती मोटरमन मनीष कुमार काही दिवस आधीपासूनच आजारी असल्याचे समोर आले आहे.

सुदैवाने लोकल धावती असताना मोटरमन कोसळले नसल्याने मोठी दुर्घटना टळली. या घटनेच्या निमित्ताने पुन्हा एकदा मोटरमन यांची ड्युटी, त्यांच्या आरामाच्या सोयी आणि कामाचा ताण याबाबत लोकल मोटरमन आणि गार्ड यांच्या वर्तुळात चर्चेला सुरुवात झाली आहे.