Tej Police Times
विद्यापीठ म्हणते, विद्यार्थ्यांचीच मागणी!
विद्यापीठामार्फत काही दिवसांपूर्वी एक सूचना जाहीर करण्यात आली असून, यानुसार चार फेब्रुवारीला होणाऱ्या जवळपास ५६ अभ्यासक्रमांच्या परीक्षा पुढे ढकलण्यात आल्या आहेत. विद्यार्थ्यांनी परीक्षेदरम्यान तयारीसाठी सुटी देण्याची मागणी केल्यामुळे या परीक्षा पुढे ढकलल्याची माहिती विद्यापीठ देत असले, तरी यामागचे खरे कारण वेगळे असल्याची माहिती पुढे आली आहे.
काय आहे खरे कारण?
विद्यापीठाचा राष्ट्रीय सेवा योजना विभाग व आर्ट ऑफ लिव्हिंगमार्फत ‘एज्यु यूथ मीट’ या उपक्रमाचे आयोजन करण्यात आले आहे. कोथरूडच्या सूर्यकांत काकडे फार्म्स येथे शनिवारी सायंकाळी ६ ते ९ या वेळेत हा उपक्रम होणार असून, त्यासाठी विद्यापीठामार्फत एक लाख स्वयंसेवक पाठविण्याचा संकल्प करण्यात आला आहे. त्याबाबतची सूचना पुणे व पिंपरी-चिंचवड परिसरातील ‘रासेयो’ कार्यक्रम अधिकाऱ्यांना देण्यात आली असून, या संकल्पपूर्तीसाठी विद्यापीठाने थेट या दिवशी होणाऱ्या सर्व परीक्षा पुढे ढकलल्या आहेत. परीक्षांमुळे एक लाख विद्यार्थी या उपक्रमात सहभागी होण्यात अडसर असल्याचे ‘रासेयो’ अधिकाऱ्यांनी सांगताच, विद्यापीठाने थेट या परीक्षांमध्ये बदल केला आहे. महाविद्यालयांनाही याबाबत स्पष्ट माहिती दिली जात नसली, तरी अनेक महाविद्यालयांचे प्राचार्य व प्राध्यापकांनी संबंधित दिवसाची परीक्षा पुढे ढकलण्याचे हेच खरे कारण असल्याचे ‘मटा’शी बोलताना सांगितले.
आधीच पुढे ढकलल्या होत्या परीक्षा
सध्या विद्यापीठामार्फत शैक्षणिक वर्ष २०२२-२३ च्या पहिल्या सत्र परीक्षा सुरू आहेत. ज्या परीक्षा दिवाळीदरम्यान होणे अपेक्षित आहेत, त्या आधीच दोन ते तीन महिन्यांनी पुढे गेल्या असून, जवळपास मार्चपर्यंत या परीक्षा चालणार आहेत. गेल्या दोन वर्षांतील प्रवेशप्रक्रिया, तसेच परीक्षांना झालेल्या विलंबामुळे विद्यार्थ्यांचे मोठे शैक्षणिक नुकसान झाले आहे. हे नुकसान भरून काढण्यासाठी विद्यापीठाने लक्ष केंद्रित करणे अपेक्षित असताना अशा निर्णयांमुळे विद्यापीठाला परीक्षांबाबत गांभीर्य नसल्याचे दिसून येत आहे.
कोणत्याही उपक्रमासाठी विद्यापीठाने परीक्षा पुढे ढकलेल्या नाहीत. अनेक विद्यार्थी परीक्षेदरम्यान सुटीची मागणी करीत होते. सातत्याने विद्यापीठाकडे विविध माध्यमांतूनही मागणी केली जात होती. त्यामुळे या दिवशीच्या परीक्षा पुढे ढकलण्याचा निर्णय घेण्यात आला आहे.
– डॉ. संजीव सोनवणे, प्र-कुलगुरू, सावित्रीबाई फुले पुणे विद्यापीठ
पदवी प्रमाणपत्रावरची नावे तपासा, मुंबई विद्यापीठाचे विद्यार्थ्यांना आवाहन
सावित्रीबाई फुले पुणे विद्यापीठात पदवी प्रमाणपत्रासाठी अर्जप्रक्रिया सुरू