पुण्यातील निवडणुकांचं चित्र पालटणार? राज ठाकरेंची मोक्याची क्षणी महत्त्वाची भूमिका, म्हणाले…

पुणे : शहरातील कसबा आणि चिंचवड विधानसभा मतदारसंघातील लोकप्रतिनिधींचं निधन झाल्याने या जागांसाठी पोटनिवडणूक घेण्यात येत आहे. या निवडणुकीसाठी भाजपने कालच आपल्या उमेदवारांची घोषणा केली. भाजपपाठोपाठ महाविकास आघाडीनेही या पोटनिवडणुकीसाठी मोर्चेबांधणी केली असून मविआकडूनही लवकरच उमेदवारांची नावे निश्चित करण्यात येणार आहेत. दोन्ही बाजूने ही निवडणूक जिंकण्यासाठी संपूर्ण ताकद झोकून दिली जात असताना मनसे अध्यक्ष राज ठाकरे यांनी पुन्हा एकदा वेगळी भूमिका घेत ही पोटनिवडणूक बिनविरोध करण्याचं आवाहन महाविकास आघाडीच्या नेत्यांना केलं आहे.

‘अंधेरी पूर्व विधानसभेच्या पोटनिवडणुकीच्या वेळी दिवंगत आमदार रमेश लटके यांच्या पत्नी शिवसेनेच्या तिकिटावर उभ्या होत्या, त्यावेळेस मी श्री. देवेंद्र फडणवीस ह्यांना निवडणूक बिनविरोध करण्याचं आवाहन केलं होतं. ज्याला सकारात्मक प्रतिसाद देत, त्यांनी ती निवडणूक बिनविरोध होऊ दिली. आता पुन्हा पिंपरी-चिंचवड आणि कसबा विधानसभांमध्ये पोटनिवडणुका होत आहेत. जो उमदेपणा भारतीय जनता पक्षाने दाखवला तोच उमदेपणा महाविकास आघाडीच्या नेत्यांनी देखील दाखवावा,’ असं म्हणत राज ठाकरे यांनी बिनविरोध निवडणुकीसाठी महाविकास आघाडीला साद घातली आहे. राज ठाकरेंनी केलेल्या या आवाहनाला मविआचे नेते कसा प्रतिसाद देतात, हे पाहणं महत्त्वाचं ठरणार आहे.

राज ठाकरेंनी पत्रात नेमकं काय म्हटलं आहे?

“सस्नेह जय महाराष्ट्र,
महाराष्ट्र विधानसभेच्या २ आमदारांचं नुकतंच दुःखद निधन झालं. या निधनामुळे रिक्त झालेल्या विधानसभा मतदारसंघांमध्ये पोटनिडणुका होत आहेत.
मी अगदी सुरुवातीपासून या मताचा आहे की, जेव्हा एखाद्या विद्यमान लोकप्रतिनिधीचं निधन होतं तेव्हा तिथे होणारी पोटनिवडणूक शक्यतो बिनविरोध करावी.
कारण मुळात जसा त्या विधानसभेतील कौल लोकप्रतिनिधीला असतो, तसाच कौल त्याच्या पक्षाला देखील असतो. अनेकदा त्या पोटनिवडणुकीत उमेदवार हा मृत व्यक्तीच्या घरातील असतो, अशावेळेस पक्षाने जर मृत व्यक्तीच्या घरातील उमेदवार दिला असेल तर, त्या उमेदवाराला बिनविरोध निवडून देणं ही एक प्रकारे, राजकीय संस्कृतीने त्या निधन झालेल्या व्यक्तीला श्रद्धांजलीच ठरणार नाही का? आणि ही प्रगल्भता महाराष्ट्राच्या राजकारणाला नवीन नाही. अर्थात उमेदवार जर निधन पावलेल्या लोकप्रतिनिधीच्या घरातील नसेल तर, जनता देखील सहानभूती दाखवेलच असं नाही.
अंधेरी पूर्व विधानसभेच्या पोटनिवडणुकीच्या वेळेस, दिवंगत आमदार रमेश लटके यांच्या पत्नी शिवसेनेच्या तिकिटावर उभ्या होत्या, त्यावेळेस मी श्री. देवेंद्र फडणवीस यांना निवडणूक बिनविरोध करण्याचं आवाहन केलं होतं. ज्याला सकारात्मक प्रतिसाद देत, त्यांनी ती निवडणूक बिनविरोध होऊ दिली.
आता पुन्हा पिंपरी-चिंचवड आणि कसबा विधानसभांमध्ये पोटनिवडणुका होत आहेत. जो उमदेपणा भारतीय जनता पक्षाने दाखवला तोच उमदेपणा महाविकास आघाडीच्या नेत्यांनी देखील दाखवावा. महाराष्ट्राची राजकीय संस्कृती प्रगल्भ आहे हे देशाला दाखवून देण्याची संधी आपल्याला सर्वांना आहे. हीच नाही तर एकूणच अशा दुःखद घटनांमुळे होणाऱ्या पोटनिवडणुका बिनविरोध कराव्यात ही इच्छा.”

मविआकडून कोणते नेते उमेदवारीच्या स्पर्धेत?

कसबा आणि चिंचवड विधानसभा पोटनिवडणुकीसाठी महाविकास आघाडीकडून आज, रविवारी उमेदवारांची नावे निश्चित केली जाणार असल्याचे सुतोवाच विरोधी पक्षनेते अजित पवार यांनी केलं आहे. दरम्यान, कसब्यातून काँग्रेसकडून उमेदवारी मिळविण्यासाठी रवींद्र धंगेकर आघाडीवर असल्याची चर्चा असून, या पार्श्वभूमीवर काँग्रेसचे बाळासाहेब दाभेकर यांनी बंडखोरी करण्याचा इशारा दिला आहे. महाविकास आघाडीची शनिवारी मुंबईत बैठक झाली. त्यामध्ये उमेदवारांबाबत एकमत होऊ शकले नाही. या पार्श्वभूमीवर आज, रविवारी पुन्हा बैठक होणार आहे. त्यामध्ये कसबा काँग्रेसकडे आणि चिंचवड राष्ट्रवादी काँग्रेस किंवा शिवसेना (ठाकरे गट) लढवणार असल्याबाबत एकमत केले जाईल आणि तशी औपचारिक घोषणा होईल. त्यानंतर संबंधित पक्षांकडून उमेदवारांची नावेही जाहीर केली जातील. महाविकास आघाडीनेही सोमवारी उमेदवारी अर्ज दाखल करण्याचे नियोजन केले असून, त्यासाठीची तयारीही केली आहे.