Tej Police Times
Video: तब्बल ५० वर्षानंतर आपल्याच गाण्यावर थिरकल्या मुमताज; वयाच्या पंच्याहत्तरीतही उत्साह पाहाच
मुंबई- लोकप्रिय बॉलिवूड अभिनेत्री मुमताज यांनी सिनेसृष्टीत एक काळ गाजवला आहे. त्यांनी अनेक चित्रपटात काम करत आपल्या अभिनयाने प्रेक्षकांना आपलंसं केलं आहे. आजही प्रेक्षक त्यांच्या नृत्याचे चाहते आहेत. मात्र गेली अनेक वर्ष मुमताज मोठ्या पडद्यापासून दूर आहेत. असं असलं तरी त्यांच्या चित्रपटांची आजही चर्चा होते. मुमताज त्या आभिनेत्रींपैकी एक आहेत ज्यांचं ग्लॅमर कधीही कमी होत नाही. त्या नेहमी सदाबहार असतात. नुकतीच मुमताज यांनी ‘इंडियन आयडल १३’च्या मंचावर हजेरी लावली. या एपिसोडमध्ये १९७० च्या दशकाची पुनरावृत्ती करण्यात आली. चॅनेलने शेअर केलेल्या प्रोमोनुसार, मुमताज ‘लोफर’ या चित्रपटातील त्यांच्याच गाण्यावर नृत्य करताना दिसत आहेत. मुमताज यांना आजही त्या गाण्यातील स्टेप्स लक्षात आहेत.
मुमताज तब्बल ५० वर्षानंतर या गाण्यावर थिरकताना दिसत आहेत. त्यांनी काळ्या रंगाचा वन पीस परिधान केला आहे. हातात सोनेरी बांगड्या परिधान करत गळ्यात निरनिराळे नेकलेस घालून त्या गाण्यावर ५० वर्षांपूर्वीच्या स्टेप्स करताना दिसत आहेत. गाणं सुरू होताच त्या गिरकी घेतात आणि नृत्य करू लागतात. मुमताज ७५ वर्षाच्या आहेत. मात्र या वयातही त्यांचा उत्साह वाखाणण्याजोगा आहे. त्यांचा हा व्हिडिओ सोशल मीडियावर वायरल होत आहे. या वयात त्यांचा उत्साह पाहून नेटकरीही अचंबित झाले आहेत. त्यांना बऱ्याच दिवसांनी छोट्या पडद्यावर पाहून नेटकरी पुन्हा त्यांच्या प्रेमात पडले आहेत.
मुमताज मूळच्या इराणच्या असून त्यांनी ‘ब्रह्मचारी (१९६८), ‘राम और श्याम (१९६७)’, ‘आदमी और इंसान (१९६९)’ आणि ‘खिलोना (१९७०)’ यांसारख्या अनेक यशस्वी चित्रपटांमध्ये काम केले आहे. मुमताज गेली अनेक वर्षे बॉलिवूडच्या कोणत्याही चित्रपटात दिसलेल्या नाहीत. त्या त्यांच्या इन्स्टाग्राम पेजवरून चाहत्यांशी संवाद साधत असतात. आता मुमताज लवकरच छोट्या पडद्यावर परतणार आहेत.