Tej Police Times
नवी दिल्ली- भोजपुरी अभिनेते आणि भाजप खासदार रवी किशन यांचे भाऊ राम किशन शुक्ला यांचे काल हृदयविकाराच्या झटक्याने निधन झाले. ते ५३ वर्षांचे होते. मुंबईतील नानावटी रुग्णालयात दुपारी १२ वाजता अभिनेत्याच्या भावाने अखेरचा श्वास घेतला. त्यांच्या पार्थिवावर काल अंत्यसंस्कार करण्यात आले. खुद्द रवी यांनी सोशल मीडियावर ही माहिती दिली. रवी यांनी अंत्यसंस्काराचे अनेक फोटो सोशल मीडियावर शेअर केले. दरम्यान, रवी किशन यांचा मोठा भाऊ मुंबईत राहत होता आणि इथे राहूनच ते अभिनेत्याच्या निर्मितीचे काम पाहत असे.
रवी किशन यांनी भावनिक पोस्ट केली
रवी किशन यांनी फोटो शेअर करत एक भावनिक पोस्टही लिहिली आहे. त्यांनी लिहिले की, ‘पंचतत्त्वात विलीन झालेले माझे थोरले बंधू राम किशन शुक्लाजी, ज्यांच्या खांद्यावर मी खेळायचो, त्यांनाच आज खांदा दिला. कदाचित हेच देवाला मंजूर असेल. आमच्या सगळ्यांवर का रागावला दादा. ओम शांती!’ गतवर्षीच्या सुरुवातीलाही अभिनेत्याच्या कुटुंबावर दुःखाचा डोंगर कोसळला होता. रवी यांचा मोठा भाऊ रमेश शुक्ला यांना कर्करोग झाल्याचे निदान झाले.
एका वर्षात दोन भावांचा मृत्यू झाला
अवघ्या वर्षभरातच दोन भावांच्या मृत्यूने अभिनेत्याच्या कुटुंबावर शोककळा पसरली आहे. इतक्या लवकर कुटुंबातील दोन सदस्य गमावल्याने अभिनेत्याच्या कुटुंबासाठी हा खूप कठीण काळ आहे. रवी यांचा भाऊ राम किशन शुक्ला यांना २५ वर्षांचा मुलगा आहे आणि त्यांच्या पत्नीचे आधीच निधन झाले होते.