कोणी मदत करणार का? लास्ट स्टेज कॅन्सरशी लढतोय अभिनेता, उपचारांसाठी उरले नाहीत पैसे

मुंबई- टीव्ही मालिका ‘निशा और उसके कजिन्स’चा अभिनेता विभू राघव कर्करोगाने ग्रस्त आहे. विभू दीर्घकाळापासून कर्करोगाशी झुंज देत आहे. त्याचा हा कर्करोग शेवटच्या स्टेजमध्ये आहे. टीव्ही इंडस्ट्रीतील स्टार्स अभिनेत्याच्या आर्थिक मदतीसाठी पुढे आले आहेत. टीव्ही अभिनेत्री अदिती मलिक, मोहसीन खान, करणवीर बोहरा आणि सिंपल कौल यांनी इन्स्टाग्रामवर पोस्ट शेअर करून चाहत्यांना विभू राघवसाठी आर्थिक मदतीची विनंती केली आहे.

सेलिब्रिटींनी केले मदतीचे आवाहन

विभूचे पूर्ण नाव वैभव कुमार सिंह राघव आहे. गेल्या वर्षी विभूला त्याला कर्करोग झाल्याचं कळलं. पण त्याचा हा कर्करोग आधीच चौथ्या टप्प्यात होता. यानंतर त्याच्यावर तातडीने उपचार सुरू केले गेले. अनेक टीव्ही सेलिब्रिटींनी त्याला आर्थिक मदत केली आहे. आता अभिनेत्री सिंपल कौलने विभू राघवसाठी फंडरेझर सुरू केले आहे.

विभूची मोहित मलिक आणि अदिती मलिकसोबत चांगली मैत्री आहे. अशात अदितीने आपल्या मित्रासाठी एक पोस्ट शेअर केली. तिने लिहिले की, ‘नमस्कार मित्रांनो, आमचा मित्र वैभवकुमार सिंह राघव याच्या उपचारासाठी आम्ही पैसे गोळा करण्याचा प्रयत्न करत आहोत. तो दुर्मिळ अशा कोलन कॅन्सरशी झुंज देत आहे. गेल्या वर्षी त्याला या कॅन्सरची स्टेज ४ असल्याचं निदान झालं. हे कळल्यावर आम्हा सर्वांनाच धक्का बसला. पण आपण सर्व मिळून त्याच्यासाठी हा प्रवास सुकर करू शकतो.

अदितीने पुढे लिहिले की, ‘गेल्या वर्षी विभूने उपचारांना चांगला प्रतिसाद दिला होता, पण त्याच्यावर आणखी उपचारांची गरज आहे. त्याच्या कुटुंबाकडे असलेली सर्व मिळकत संपली आहे. त्याच्यावर मुंबईतील टाटा मेमोरियल हॉस्पिटलमध्ये उपचार सुरू आहेत. त्याच्या एका इम्युनोथेरपीची किंमत ४.५ लाख रुपये आहे. त्याच्या उपचारासाठी मोठी रक्कम आवश्यक आहे. पैसे उभारण्यासाठी आम्ही शक्य ते सर्व प्रयत्न करत आहोत. तुमची मदत आमच्या मित्राला मदत करू शकते. जमेल तेवढे दान करा. त्यालाही तुमच्या प्रार्थनेत लक्षात ठेवा.’

टीव्ही अभिनेत्री मोहसिन खाननेही विभू राघवसोबतचा फोटो शेअर करताना चाहत्यांकडे आर्थिक मदत करण्याची विनंती केली. दरम्यान, विभू ‘सावधान इंडिया’मध्येही दिसला. गेल्या वर्षी त्याने इन्स्टाग्रामवर व्हिडिओ शेअर करून त्याला कर्करोग झाल्याचं सांगितलं होतं. तसेच आता अभिनेता रुग्णालयातील अनेक फोटो शेअर करत चाहत्यांना त्याच्या उपचाराबाबत माहितीही देत असतो.