Tej Police Times
मुंबई- दाक्षिणात्य चित्रपटसृष्टीमध्ये आगळावेगळ्या ठरलेल्या ‘कांतारा’ चित्रपटाने प्रेक्षकांना अक्षरशः वेड लावलं. या चित्रपटाने कमाईचे रेकॉर्ड मोडले. फक्त १६ कोटींमध्ये तयार झालेला हा चित्रपट एका देवाच्या रक्षकाची कहाणी होती. दाक्षिणात्य दिग्दर्शक आणि अभिनेता ऋषभ शेट्टी याच्या ‘कांतारा’ने चाहत्यांना एक कधीही न पाहिलेला अनुभव दिला. हा चित्रपट याआधी केवळ कन्नड भाषेतच प्रदर्शित करण्यात आला होता. मात्र चित्रपटाला मिळणार जबरदस्त प्रतिसाद पाहून पुढे हा चित्रपट पॅन इंडिया प्रदर्शित करण्यात आला. त्यानंतर ‘कांतारा’ने जी कमाल केली ती आणखी जबरदस्त होती. या चित्रपटाने ४०० ते ४५० कोटीची कमाई केली. आता ‘कांतारा’च्या चाहत्यांसाठी एक चांगली बातमी आहे. लवकरच ‘कांतारा’चा दुसरा भाग प्रेक्षकांच्या भेटीला येणार आहे.
‘कांतारा’ची कथा दैवा कोलाभोवती फिरते. ही कथा १८४७ मधील मंगळूरच्या राजाची आहे, ज्याला आपल्या घरात शांतता हवी आहे आणि म्हणून तो गावकऱ्यांकडे स्थानिक देवता पंजुर्लीची मूर्ती मागतो. पंजुर्ली हा भगवान विष्णूचा अवतार मानला जातो आणि कन्नड लोक त्याची पूजा करतात. कर्नाटकात पंजुर्ली देवता अत्यंत मानाची आहे. येथील लोक भूत कौला उत्सवादरम्यान भगवान पंजुर्ली म्हणून वेशभूषा करतात आणि नंतर त्यांना प्रार्थना करतात. ‘कांतारा’ ३ सप्टेंबर २०२२ मध्ये प्रदर्शित झाला होता.