ती परत येतेय! खतरनाक कथानक, अनपेक्षित शेवट अन् जबरदस्त अभिनय घेऊन ‘वाळवी २’ येतोय

मुंबई- लोकप्रिय अभिनेता सुबोध भावे,स्वप्नील जोशी, अनिता दाते, शिवानी सुर्वे, यांच्या अभिनयाने सजलेला ‘वाळवी’ हा चित्रपट अजूनही चित्रपटगृहात धुमाकूळ घालतोय. या चित्रपटाने प्रेक्षकांना अनपेक्षित असा धक्का दिला. या चित्रपटातील प्रत्येक पात्र प्रेक्षकांच्या पसंतीस उतरलं. परेश मोकाशी दिग्दर्शित ‘वाळवी’ या चित्रपटाने प्रेक्षकांना वेड लावलं. प्रेक्षकांनी चित्रपटाचं भरभरून कौतुक केलं. या चित्रपटाला माऊथ पब्लिसिटीचा चांगलाच फायदा झाला. चित्रपटाने बॉक्स ऑफिसवरदेखील चांगली कमाई केली. आता प्रेक्षकांसाठी आणखी एक गुड न्यूज आहे. ‘वाळवी’ च्या अभूतपूर्व यशानंतर चित्रपटाच्या दिग्दर्शक आणि निर्मात्यांनी ‘वाळवी २’ ची घोषणा केली आहे. लवकरच ‘वाळवी’ चित्रपटाचा दुसरा भाग प्रेक्षकांना पाहायला मिळणार आहे.

नुकतीच ‘वाळवी’च्या यशासाठी खास पार्टीचं आयोजन करण्यात आलं होतं. या पार्टीला चित्रपटाच्या कलाकारांसह, निर्माते, दिग्दर्शक आणि काही पत्रकारही हजर होते. याच प्रसंगी चित्रपटाचे दिग्दर्शक आणि लेखक परेश मोकाशी यांनी ‘वाळवी २’ची घोषणा करत सगळ्यांना आश्चर्याचा धक्का दिला. पुढच्या भागातही प्रेक्षकांना आणखी नवीन काहीतरी पाहायला मिळणार आहे. आधीच्या चित्रपटातली उत्सुकता, अनपेक्षितपणा, ट्विस्ट सगळंच पुढच्या भागातही कायम राहणार आहे. ‘वाळवी २’मध्ये प्रेक्षकांना आणखी चांगला अनुभव येईल, असं ते म्हणाले. या प्रसंगी बोलताना स्वप्नील भावुक झाला होता. मराठी चित्रपटसृष्टीमधला हा पहिलाच प्रयत्न होता. परंतु, तो यशस्वी ठरल्याने आता आणखी गूढ रहस्य असणारे चित्रपट येतील अशी अपेक्षा नेटकऱ्यांनी व्यक्त केली आहे.

वाळवी कधी प्रदर्शित होईल याबद्दल कोणतीही घोषणा करण्यात आलेली नाही मात्र पुढील वर्षी किंवा २०२३ च्या शेवटी हा चित्रपट प्रेक्षकांच्या भेटीला येण्याची शक्यता आहे. त्यामुळे आता ‘वाळवी’ नंतर ‘वाळवी २’ पाहण्यासाठी प्रेक्षक उत्सुक आहेत.