४ वर्षांनी एकदा साजरा करतात लग्नाचा वाढदिवस, सारखीच तरी वेगळी आहे पर्ण- आलोकची Love Sstory

मुंबई- मराठी मनोरंजन क्षेत्रातील कलाकार म्हणून अभिनेत्री पर्ण पेठे आणि आलोक राजवाडे प्रसिद्ध आहे. त्यांनी अनेक चित्रपट आणि नाटकांमध्ये उत्तम कलाकृती सादर करुन प्रेक्षकांची मनं जिंकली. रमा-माधव, मीडियम स्पायसी, फोटोकॉपी यांसारख्या अनेक गाजलेल्या चित्रपटांमध्ये पर्णने अभिनय केला. तर आलोकनेही त्याच्या कलेतून प्रेक्षकांचं मनोरंजन केलं. आज आलोक राजवाडे आपला वाढदिवस साजरा करत आहे. पडद्यावरील ही रमा माधवची जोडी प्रेक्षकांना फार आवडली. त्यानंतर या जोडप्याने खऱ्या आयुष्यातही एकमेकांची साथ देण्याचा निर्णय घेतला.

आधी मैत्री आणि मग सहा वर्ष डेटींग

पर्ण आणि आलोकच्या लग्नाच्या व्लॉगमध्ये अभिनेता अमेय वाघने या दोघांच्या लव्हस्टोरीबद्दल अनेक रंजक किस्से सांगितले होते. अमेय हा पर्ण आणि आलोकचा कॉलेजपासूनचा मित्र होता. ते एकत्र नाटकाचे प्रयोग करायचे. नाटकाच्या निमित्ताने त्यांचा बराच प्रवास व्हायचा. अमेयने सांगितले की, प्रवासादरम्यान पर्ण आणि आलोकमध्ये वाढलेली जवळीक आम्ही पाहायचो. त्यानंतर ते रिलेशनशिपमध्ये असल्याचेदेखील आम्हाला माहीत होते. त्यामुळे आम्ही सगळे त्यांच्या लग्नाची फार वाट पाहत होतो.

धार्मिक विधी न करता कोर्ट मॅरेज करण्यास घेतला निर्णय

आलोक आणि पर्णने आपल्या लग्नाचा फार गाजावाजा केला नाही. अगदी साधेपणाने लग्न करायचा निर्णय त्यांनी घेतला. त्यामुळे कुटुंब आणि मोजक्या मित्रांच्या उपस्थितीत त्यांनी कोर्ट मॅरेज केलं. लग्नाच्या दिवशी पर्णने लाल रंगाची साऊथ पॅटर्नची साडी आणि दागिने घातले होते तर आलोकने साधा कुर्ता-पायजमा आणि त्यावर नेहरु कोट असा पोशाख परिधान केला होता. विशेष म्हणजे या दोघांना आपले लग्न इतरांपेक्षा थोडे हटके हवे होते. त्यामुळे त्यांनी लग्नासाठी चार वर्षांतून एकदा येणारी २९ फेब्रुवारी ही तारीख निवडली होती.

पर्ण- आलोकच्या लग्नात इंडस्ट्रीतील अनेक कलाकारांची उपस्थिती

पुण्यातील एका मंगल कार्यालयात वकिलांसमोर सही करुन पर्ण आणि आलोक विवाहबद्ध झाले. त्यानंतर त्यांनी इंडस्ट्रीतील खास मित्र- परिवारासाठी छोटीशी पार्टी ठेवली होती. या पार्टीला सुयश टिळक, जितेंद्र जोशी, निपूण धर्माधिकारी, अमेय वाघ, गायिका सावनी रविंद्र यांनी उपस्थिती लावली होती. पार्टीत नवविवाहीत दाम्पत्यांनी धम्माल डान्स केल्याचा व्हिडिओ व्हायरल झाला होता.