कियारा आडवाणीचा नववधूच्या लेहंग्यातील Video व्हायरल, काय आहे व्हिडिओ मागचं सत्य?

सोशल मीडियावर व्हायरल झालेल्या व्हिडिओमध्ये कियारानं लाल रंगाचा नववधूचा पेहराव केला आहे. हातामध्ये कलीरा आणि मेंदी लावलेली दिसत आहे. हा व्हिडिओ कियाराच्या लग्नातला नाही. तर एका जाहिरातीच्यावेळी केलेला हा व्हिडिओ आहे.

हे वाचा-राखीचा नवरा आदिल खानला मुंबई पोलिसांनी ठोकल्या बेड्या! अभिनेत्रीनेच केलेली तक्रार

जुना व्हिडिओ चर्चेत

सोशल मीडियावर कियाराचा हा व्हायरल झालेला व्हिडिओ पाहून अनेक नेटकरी गोंधळात पडले आहेत. त्यांना हा व्हिडिओ कियाराच्या खऱ्या खुऱ्या लग्नातला वाटला. त्यामुळे त्यांनी कियाराच्या दिसण्यावर कमेंट करायला सुरुवात केली आहे. अनेकांनी हा व्हिडिओ जुना असल्याचंही म्हटलं आहे. कारण अजून सिद्धार्थ कियाराचं लग्न लागलेलं नाही, असंही त्यांनी नमूद केलं आहे.

दरम्यान, आज सिद्धार्थ मल्होत्रा आणि कियारा आडवाणी याचं लग्न होत आहे. जैसलमेर इथल्या सूर्यगढ पॅलेसमध्ये होणाऱ्या या लग्नसोहळ्यासाठी ५ तारखेपासूनच पाहुणे येऊन दाखल झाले आहेत. त्यात करण जोहर, शाहिद कपूर, ईशा अंबानी यांसारखे अनेक सेलिब्रिटी दाखल झाले आहेत. लग्नसोहळ्याला १५० जण उपस्थित असल्याचं सांगितलं जात आहे. आधी त्यांच्या लग्नाची तारीख ६ असल्याचे समोर आले होते, मात्र त्यानंतर ७ फेब्रुवारीची तारीख समोर आली.

कियारा-सिद्धार्थच्या लग्नसोहळ्यात ‘नो फोन पॉलिसी’

सिद्धार्थ मल्होत्रा आणि कियारा आडवाणीनं त्यांच्या लग्नातदेखील ‘नो फोन पॉलिसी’चा अवलंब केला आहे. कुटुंबीय, पाहुणे, मित्रमंडळी, बॉलिवूड सेलिब्रिटी यांच्यासह हॉटेलमधील कर्मचाऱ्यांनादेखील लग्नसोहळ्यादरम्यानचे फोटो सोशल मीडियावर पोस्ट न करण्याची विनंती केली आहे. यामुळे कियारा-सिद्धार्थच्या मेहंदी, संगीतचे फोटो व्हिडिओ चाहत्यांना पाहता आलेले नाहीत.

कियारा-सिद्धार्थची लव्हस्टोरी

सिद्धार्थ आणि कियारानं ‘शेरशाह’ या सिनेमात एकत्र काम केलं होतं.या सिनेमाआधीपासूनच ते एकमेकांना ओळखत होते. त्यांची पहिली भेट कियाराच्या ‘लस्ट स्टोरीज’च्या रॅपअप पार्टीमध्ये झाली होती. या पार्टीनंतर त्यांची चांगली मैत्री झाली. त्यानंतर दोघांनाही ‘शेरशाह’ या सिनेमासाठी विचारणा झाली. या सिनेमाच्या शूटिंगदरम्यान त्यांची जवळीक वाढली. पुढे या मैत्रीचं रुपांतर प्रेमात झालं आणि २०२१ मध्ये त्यांनी त्यांचं नातं पुढे नेण्याचा निर्णय घेतला. दोघांच्याही घरुन या लग्नाला संमती मिळाली आणि आज ते लग्नबंधनात अडकणार आहेत.

हे वाचा-विशाखाची लाखमोलाची साडी; ज्या व्यक्तीने दिली भेट त्यांना भेटायचं राहून गेल्याची खंत

सिद्धार्थ-कियाराचं घर
सिद्धार्थ सध्या मुंबईतील कार्टर रोड परिसरात राहतोय. तर कियारा दक्षिण मुंबईत राहत आहे. पण आता लग्नानंतर ते जुहू परिसरात राहणार असल्याचं म्हटलं जात आहे. सिद्धार्थने जुहू येथील एक सी-फेसिंग घर विकत घेतलं आहे. या घराची किंमत तब्बल ७० कोटी आहे.