प्रसाद ओक आणि सई ताम्हणकर यांची हात जोडून जाहीर माफी, काय घडलं नेमकं?

मुंबई: मराठी सिनेसृष्टीतील अभिनेत्री वनिता खरात नुकतीच विवाहबंधनात अडकली. बॉयफ्रेंड सुमित लोंढेसोबत तिनं लग्नगाठ बांधली. वनिता आणि सुमितवर मित्र-मैत्रिणी, चाहत्यांनी शुभेच्छांचा वर्षाव केला. या लग्नाचे फोटोही सोशल मीडियावर प्रचंड व्हायरल झाले आहेत.

वनिताच्या लग्नाला अनेक सेलिब्रिटींनी हजेरी लावली होती. ‘महाराष्ट्राची हास्यजत्रा’च्या टीममधील बऱ्याच सदस्यांनी त्यांच्या वनीच्या लग्नाला हजेरी लावली होती. पण चर्चा झाली ती जे सदस्या आले नाहीत त्यांची. परिक्षकाच्या खुर्चीत असलेला अभिनेता प्रसाद ओक आणि अभिनेत्री सई ताम्हणकर वनिताचा लग्नाला आले नव्हते. तर प्राजक्ता माळीही वनिताच्या लग्नाला गैरहजर होती. त्यामुळं चर्चा झाली नसती तरच नवल.

आता सई आणि प्रसादनं हात जोडून वनिताची जाहीर माफी मागितली आहे. प्रसाद ओकनं एक फोटो शेअर केलाय. या फोटोत त्याच्यासोबत सोनी मराठीचे कंटेट हेड अमित फाळके आणि सई दिसून येतायत. या ते तिघंही हात जोडून माफी मागताना दिसतात. तर कॅप्शनमध्ये लिहिलं की, ‘वनिताच्या लग्नाला उपस्थित राहता न आल्यामुळं मी, सई ताम्हणकर आणि अमित फाळके, जाहीर माफी मागत आहोत. असं त्यांनी त्यांच्या इन्स्टास्टोरीवर म्हटलं आहे.

सुट्टी नाही फक्त काम
लग्नानंतर अवघ्या दोन -तीन दिवसांतच वनितानं पुन्हा कामाला सुरुवात केली आहे. शोमधील वनिताची सहकलाकार ईशा डे हिनं सेटवरील वनिताचा एक व्हिडिओ शेअर केला आहे त्यामध्ये अभिनेत्री नवविवाहित लूकमध्ये सुंदर दिसत आहे. वनिताचे ३ फेब्रुवारीला लग्न झालं आणि लग्नानंतर दुसऱ्या दिवशी तिने पुन्हा कामाला सुरुवात केली. शिवाय, अभिनेत्रीकडं आणखी काही शूट आहेत जे ती लवकरच सुरू करणार आहे.

त्याचीही चर्चा
वनिताच्या लग्नात ‘महाराष्ट्राची हास्यजत्रा’ च्या टीममधील तिचे खास मित्र आवर्जून आले होते. त्यांनी वनितासाठी छानसा परफॉर्मन्सदेखील दिला. मात्र नेटकऱ्यांना एक गोष्ट खटकली ते म्हणजे ओंकारचं लग्नाला न येणं. हास्यजत्रेमधे ओंकार आणि वनिता यांचे स्किट प्रेक्षकांना प्रचंड आवडायचे. त्यांची केमिस्ट्री प्रेक्षकांना खूप आवडायची.