आयुष्यभरासाठी एकमकांचे झाले कियारा-सिद्धार्थ, शेरशाह कपल अडकलं विवाहबंधनात

मुंबई : गेल्या अनेक दिवसांपासून सातत्यानं चर्चा होत असलेलं बॉलिवूडमधील क्युट कपल सिद्धार्थ मल्होत्रा (Sidharth Malhotra) आणि कियारा अडवाणी (Kiara Adavni) लग्नबंधनात अडकले आहेत. दोघांच्याही आयुष्यात ७ फेब्रुवारी २०२३ हा दिवस खऱ्या अर्थानं संस्मरणीय आणि सुंदर दिवस ठरला आहे. राजस्थानमधील जैसलमेर इथल्या सूर्यगढ पॅलेसमध्ये या दोघांचा शाही विवाहसोहळा दणक्यात आणि उत्साही वातावरणात पार पडला. या दोघांच्या विवाह सोहळ्याला त्यांचे कुटुंब, जवळचे नातेवाईक आणि काही खास मित्रमंडळी आवर्जून उपस्थित होते. या सर्वांच्या साक्षीनं, शुभेच्छांसह कियारा मल्होत्रांच्या घरची सून झाली.

सूर्यगढ पॅलस मध्ये गेल्या तीन चार दिवसांपासून कियारा आणि सिद्धार्थ यांच्या शाही विवाह सोहळ्याचं आयोजन करण्यात आलं होतं. लग्नाच्यावेळी नवरदेव सिद्धार्थनं धमाकेदार एंट्री घेतली. सिद्धार्थनं ‘साजन जी घर आए’ या प्रसिद्ध गाण्यावर पांढऱ्या शुभ्र घोडीवर बसून प्रवेश केला. त्याशिवाय त्याच्या मंडपप्रवेशावेळी अनेक लोकप्रिय गाणी वाजवण्यात आली.

पाहा कियारा-सिद्धार्थच्या लग्नाचे फोटो

सिड-कियाराच्या लग्नसोहळ्याला होते हे वऱ्हाडी
सिद्धार्थ आणि कियाराच्या लग्नसोहळ्यामध्ये अनेक सेलिब्रिटी वऱ्हाडी म्हणून सहभागी झाले होते. अनेक कलाकार मुंबईहून जैसलमेरला जाताना दिसले. सिद्धार्थ आणि कियाराच्या लग्नानंतर रिसेप्शन होणार आहे. त्याला सोनाक्षी सिन्हा, आरती शेट्टी, पूजा शेट्टी, शकुन बत्रा यांच्यासह अनेक बॉलिवूडमधील कलाकार सहभागी होणार आहेत. लव बर्ड्स सिद्धार्थ आणि कियारा यांच्या विवाहपूर्व विधींना सोमवारी सूर्यगढ पॅलेसमध्ये प्रारंभ झाला. त्यावेळी राजस्थानी लोकगीतांचा आवाज ऐकू येत होता.

सिद्धार्थला बांधला सेहरा
दुपारी दोन वाजण्याच्या सुमारास सिद्धार्थला सेहरा बांधण्याचा विधी झाला. त्यावेळी नवऱ्याकडच्या वऱ्हाडी मंडळींनाही फेटे बांधण्यात आले.त्यानंतर सिद्धार्थची वरात निघाली. ही वरात राजेशाही थाटाची होती. त्यात विन्टेज गाड्या, उंट, घोड्यांचा काफिला होता.

चार वाजता सिद्धार्थ कियाराचं झालं लग्न
कियारा आणि सिद्धार्थनं चारच्या सुमारास सप्तपदी घेण्यास सुरुवात केली. सूर्यगढ इथला बावडी इथला मंडप लग्नस्थळ होतं. या दोघांचं लग्न पंजाबी पद्धतीनं झालं. दरम्यान, आज सकाळी ११ वाजता पॅलेसमधील हवेली साईट इथं हळदी कार्यक्रम झाला. त्यावेळी दोघांच्या कुटुंबातील सदस्यांना वधू-वरांना हळद लावली.

लग्नसोहळ्यातील सेलिब्रिटींना देशी ब्रेकफास्ट
सिद्धार्थ आणि कियारा यांच्या लग्नसोहळ्यासाठी आलेल्या पाहुण्यांना खास देशी पद्धतीचा ब्रेकफास्ट देण्यात आला. जुही चावला ही देखील या सोहळ्यात सहभागी झाली आहे. तिनं सूर्यगढ पॅलेसमधून लग्नसोहळ्याच्या आधी पाहुण्यांना जो ब्रेकफास्ट दिला त्याचा फोटो शेअर केला होता. पाहुण्यांना दिलेल्या ब्रेकफास्टमध्ये पराठा, गुळ, दही, लोणच यांचा समावेश होता.

कियारा-सिद्धार्थच्या लग्नसोहळ्यात ‘नो फोन पॉलिसी’
सिद्धार्थ मल्होत्रा आणि कियारा आडवाणीनं त्यांच्या लग्नातदेखील ‘नो फोन पॉलिसी’चा अवलंब केला आहे. कुटुंबीय, पाहुणे, मित्रमंडळी, बॉलिवूड सेलिब्रिटी यांच्यासह हॉटेलमधील कर्मचाऱ्यांनादेखील लग्नसोहळ्यादरम्यानचे फोटो सोशल मीडियावर पोस्ट न करण्याची विनंती केली आहे. यामुळे कियारा-सिद्धार्थच्या मेहंदी, संगीतचे फोटो व्हिडिओ चाहत्यांना पाहता आलेले नाहीत.