लॉजमध्ये अविवाहित जोडपी एकत्र सापडल्यास अटक होऊ शकते का?​ तुमच्या मनातील प्रश्नांची उत्तरं

मुंबई : व्हॅलेंटाईन्स वीकमध्ये अनेक अविवाहित जोडपी प्रेमाचा उत्सव साजरा करताना दिसतात. कधी रेस्टॉरंट, बाग, समुद्र किनारे यासारख्या सार्वजनिक ठिकाणी त्यांच्या भेटीगाठी घडतात, तर कधी प्रेमाची पुढची पायरी गाठत हॉटेल-लॉज यासारख्या ठिकाणांचा त्यांना चोरुन आसरा घ्यावा लागतो. खरं तर वयाची १८ वर्ष पूर्ण केल्यानंतरही आपण परस्पर संमतीने कोणासोबत कुठे जावं, कुठे राहावं या गोष्टींवर भारतीय समाजात बंधनं का येतात, हा प्रश्न अनेकांना सतावतो. अविवाहित जोडप्यांना आजही अनेक ठिकाणी अडीअडचणींचा सामना करावा लागतो.

तुम्ही अविवाहित असलात तर काय झालं? कायद्याने सज्ञान असलेल्या कोणत्याही दोन व्यक्ती हॉटेलमध्ये एकत्र राहण्यास मोकळ्या आहेत. तुम्हाला एकत्र राहण्यास प्रतिबंध करणारा कोणताही कायदा अस्तित्वात नाही. आपल्या देशात अनेक हॉटेल्स आणि होम स्टे अविवाहित जोडप्यांना एकत्र राहण्यास परवानगी देत नाहीत. मात्र त्याला कायद्याचा आधार नाही.

अविवाहित जोडपे भाड्याच्या घरात एकत्र राहू शकते का?

तुम्ही अविवाहित जोडपे म्हणून एखादा अपार्टमेंट भाड्याने घेता तेव्हा, करार तुमच्या दोघांच्या नावे असल्याची खात्री करा. मात्र, एक गोष्ट ध्यानात असू द्या, की असा कोणताही कायदा नाही, जो अविवाहित जोडप्यांना कुठेही जागा घेण्याची परवानगी देत नाही.

लॉजमध्ये अविवाहित जोडपी एकत्र सापडली तर अटक होऊ शकते का?

तुम्ही एका लॉज किंवा हॉटेलच्या खोलीत परस्पर संमतीने एकत्र राहत असाल आणि तुम्ही प्रौढ असल्याचे सिद्ध करणारे वैध ओळखपत्र तुमच्याकडे असेल, तर कोणताही पोलिस कर्मचारी तुम्हाला अटक करू शकत नाही.

सार्वजनिक ठिकाणी वावरण्यास बंधनं आहेत का?

तुम्ही सार्वजनिक ठिकाणी अविवाहित जोडपे म्हणून कुठेही बसू शकता. भादंवि कलम २९४ नुसार जर तुम्ही सार्वजनिक ठिकाणी कोणतेही “अश्लील कृत्य” केले तर तुम्हाला तीन महिन्यांच्या तुरुंगवासाची शिक्षा होऊ शकते. पोलिसांकडून या कलमाचा मोठ्या प्रमाणात गैरवापर केला जात असल्याचा आरोपही होतो. परंतु तुम्ही एकत्र फिरत असाल किंवा एखाद्या ठिकाणी फक्त एकत्र बसले असाल तर पोलिस तुम्हाला अटक करू शकत नाहीत.

हेही वाचा : वंडरला लॉजवर सुरु होते नसते उद्योग, पोलिसांनी छापा टाकत वेश्या व्यवसायाचं कंबरडं मोडलं

लॉजवर छापेमारी का होते?

वेश्या व्यवसाय करणे हा कायद्याने गुन्हा असल्यामुळे त्यासंदर्भात टिप मिळाल्यास पोलीस लॉज, स्पा सेंटर, ब्युटी पार्लर, मसाज पार्लर यासारख्या संशयास्पद ठिकाणी छापेमारी करतात. छाप्याच्या वेळी एखादे अविवाहित जोडपे सापडले, तरी ते दोघेही जर कायद्याने सज्ञान असतील, त्यांच्याकडे वयाचा दाखला देणारे वैध ओळखपत्र असेल, तसेच दोघेही परस्पर संमतीने एकत्र आले असतील, तर ते मोकळेपणाने आपण वेश्या व्यवसायात सहभागी नसल्याचे सिद्ध करु शकतात. अशा अविवाहित जोडप्याला पोलीस विनाकारण अटक करु शकत नाहीत.

हेही वाचा : मुंबईकर बँक मॅनेजरची बुलढाण्यातील ऊसाच्या शेतात हत्या, लॉजची चावी ठरली कारण