Tej Police Times
सध्या प्रिया आणि उमेश त्यांच्या कामातून ब्रेक घेत काश्मीरमध्ये सुट्ट्यांचा आनंद घेत आहेत. तिथले फोटो, व्हिडिओ दोघंहीजण सोशल मीडियावर शेअर करत आहेत. चाहते देखील त्यांच्या या फोटोंवर, व्हिडिओवर भरभरून कॉमेन्ट करत आहेत. आता देखील उमेशनं त्या दोघांचा काश्मीरमधला एक मजेशीर व्हिडिओ शेअर केला आहे. हा व्हिडिओ शेअर करताना उमेशनं काहीही लिहिलेलं नाही. फक्त त्यानं व्हिडिओ शेअर केला आहे.
काय आहे उमेशचा व्हिडिओ
उमेशनं जो व्हिडिओ शेअर केला आहे, त्यामध्ये त्यानं काळ्या रंगाचा स्वेटर आणि डोक्यावर पांढऱ्या रंगाची लोकरीची टोपी घातलेली दिसत आहे. या व्हिडिओत उमेश म्हणतोय की, ‘प्रेमाची परीक्षा काय असते ते बघा. सकाळचे सात वाजले आहेत. सहा वाजल्यापासून आम्ही उठून तयार झालो परंतु हा शिकारावाला उशीरा आला. आता इथं शून्य डिग्री सेल्सिअस तापमान आहे. अशा या वातावरणात बायकोचा हट्ट् म्हणून आम्ही चाललो आहोत भाजी मार्केट बघायला!’
उमेश पुढं म्हणतोय की, ‘आम्हाला काहीही घ्यायचं नाहीये. फक्त हे भाजी मार्केट बघायला चाललो आहोत. यापेक्षा प्रेमाची परीक्षा दुसरी असूच शकत नाही. म्हणजे आपल्या मुंबईत दादरमध्ये भाजी मार्केटमध्ये जाण्यासाठी सकाळी सहा वाजता उठणं वेगळं… पण काश्मीरमध्ये आलोय फिरायला आणि फक्त ब्रश करून चाललो आहोत कुठं तर फक्त भाजी मार्केट बघायला! चार लेअरचे कपडे घालून, शून्य डिग्री अंश तापमानामध्ये भाजी मार्केटची सफर करायला चाललो आहोत.’
दोन महिन्यांपूर्वी खास मुहूर्तावर घेतली होती कार, मीरा जगन्नाथच्या नव्या गाडीचा मोठा अपघात
उमेश हे सर्व बोलत असताना त्याचवेळी प्रिया तिच्या मोबाईलमधून तिथलं तापमान दाखवते. तेव्हा शून्य डिग्री तापमान दिसतं. उमेश हा व्हिडिओ चित्रीत करत असताना प्रिया मात्र पोटधरून हसताना दिसत आहे. याच व्हिडिओमध्ये उमेश फ्लोटिंग भाजी मार्केटचा नजारा दाखवत आहे. तलावामध्ये अनेक बोटींमध्ये भाजी विकणारे दिसत आहेत. त्यांच्याकडे काही जण बोटींमधून भाजी विकत घ्यायला आलेले दिसत आहेत.