Valentine’s Day Special: जाणून घेऊया राधा कृष्णाची अनोखी प्रेम कथा

अशी झाली राधाकृष्णाची भेट,

ब्रह्मवैवर्त पुराणातील प्रकृती खंड आणि यदुवंशीय कुलगुरू गर्ग ऋषींनी लिहिलेल्या गर्ग संहिता कथेनुसार, नंदबाबा एकदा श्रीकृष्णाला घेऊन बाजारहाटात जातात. राधा आणि तिचे वडील देखील त्याच वेळी तेथे पोहोचतात. तिथे त्या दोघांची भेट होते. त्यावेळी दोघेही वयाने लहान असतात. ती जागा प्रतिकात्मक तीर्थ स्थळ म्हणवली जाते. हे स्थळ बहुदा नांदगांव ते बरसानेच्या मध्ये आहे. संकेत या शब्दाचा अर्थ आहे पूर्वनिर्धारित भेटण्याचे ठिकाण. यासंदर्भात ब्रह्मवैवर्त पुराणात एक मोठी कथा आहे. श्रीमद् भागवत आणि विष्णू पुराणानुसार, वृंदावनात श्रीकृष्ण आणि राधा यांची भेट झाली. त्यावेळी श्रीकृष्ण सात, तर राधा बारा वर्षांची होती. त्यांच्याच वयोगटाच्या मुलांचा मोठा गोतावळा असे. मुलांच्या या गोतावळ्याला कवींनी प्रेमलीलेत रूपांतर केले आहे, असे सांगितले जाते.

अशीही एक कथा सांगितली जाते

अशी आख्यायिका आहे की एकदा सूर्यग्रहणाच्या वेळी देवी राधा माता यशोदा आणि नंद बाबा यांच्यासोबत कुरुक्षेत्रावर आली होती. त्यावेळी भगवान श्रीकृष्णाचा विवाह रुक्मिणीशी झाला होता. येथे राधा आणि कृष्णाची भेट झाली आणि रुक्मिणीनेही राधाला पहिल्यांदा पाहिले. रुक्मिणीने राधाला गरम दूध प्यायला दिले. राधाने हे दूध प्यायल्याने भगवान श्रीकृष्णाच्या अंगावर फोड आले. रुक्मिणीने श्रीकृष्णाच्या अंगावरील फोड पाहिल्यावर तिने कारण विचारले. श्रीकृष्णाने सांगितले की, राधाचे गरम दूध प्यायल्याने त्यांच्यासोबत असे घडले कारण राधा त्यांच्या हृदयात वास करते. राधाला त्रास होतो तेव्हा त्याचा माझ्यावर परिणाम होतो. राधाकृष्णाच्या प्रेमाच्या खोलवरची ही फक्त एक झलक आहे. त्यांच्या प्रेमाबाबत आणखी काही रंजक गोष्टी आहेत.

यानंतर कृष्णाने बासरी वाजवली नाही

श्रीकृष्णाच्या बासरीमधून निर्माण होणाऱ्या मंजूळ संगीतामुळे राधा कृष्णावर मोहित झाली होती आणि त्यामुळेच ते एकत्र आले होते. कृष्ण आणि राधा काही परिस्थितीमुळे एकमेकांपासून दूर झाले असले, तरी ती बासरी नेहमी त्यांच्यामधील दुवा साधायची. त्या बासरीमधून मंत्रमुग्ध करणारे अवीट गोडीचे संगीत बाहेर पडत असे, जे थेट राधेपर्यंत पोहोचत असे, असे सांगितले जाते.

द्वारकेत काम करता करता राधेला श्रीकृष्णांना पाहायची संधी मिळत असे. मात्र, एके दिवशी राधाने त्या राजवाड्यापासून लांब जाण्याचे ठरविले. राधा एका अरण्य गावात राहू लागली. अंतिम घटिक समीप आली, तेव्हा श्रीकृष्णांनी राधेची भेट घेतली. श्रीकृष्णाकडून बासरी ऐकण्याची इच्छा राधेने प्रकट केली. श्रीकृष्णाने राधेची इच्छा पूर्ण केली. ते सुमधूर संगीत ऐकून राधेचे भान हरपले. श्रीकृष्ण राधेसाठी दिवसरात्र बासरी वाजवू लागला. राधा देह त्यागून अनंतात विलीन होईपर्यंत श्रीकृष्णाने आपले बासरीवादन थांबवले नाही. यानंतर दुसऱ्याच क्षणी श्रीकृष्णाने प्राणप्रिय बासरीचा राधेच्या विरहात त्याग केला. त्यानंतर श्रीकृष्णाने अवतारकार्य पूर्ण होईपर्यंत बासरी वाजवली नाही, असा मतप्रवाह आणि मान्यता आहे.