Tej Police Times
सन २०१४ साली लोकसभा निवडणुकीच्या दरम्यान या तिन्ही आरोपींच्या वाहनात शस्त्र आढळून आले होते. याची विचारपूस करताना तत्कालीन सहाय्यक पोलीस आयुक्त आणि अंबड पोलीस ठाण्याचे तत्कालीन पोलीस निरीक्षक यांच्या कामात अडथळा आणल्याप्रकरणी नाशिकच्या अंबड पोलीस ठाण्यात गुन्हा दाखल करण्यात आला होता.
ठाकरे गटाचे महानगरप्रमुख सुधाकर बडगुजर आणि इतर दोघांविरुद्ध हा गुन्हा सिद्ध झाला असून, कलम ३५३ प्रमाणे एक वर्षाची शिक्षा आणि प्रत्येकी पाच हजार रुपयांचा दंड, तसेच कलम ३७ आणि १३५ प्रमाणे सहा महिने कारावास आणि प्रत्येकी एक हजार रुपयांचा दंड सुनावण्यात आल्याची माहिती सरकारी वकील रवींद्र निकम यांनी दिली.
मात्र, घटना घडली त्या दिवशी सरकारी कामात अडथळा आणल्याचे एकूण तेरा गुन्हे दाखल झाले होते. मात्र हे सर्व निर्दोष सुटले आणि आम्हालाच शिक्षा झाली असल्याचा दावा ठाकरे गटाचे महानगरप्रमुख बडगुजर यांनी केला. या निर्णयाविरोधात आम्ही उच्च न्यायालयात अपील करणार असल्याची माहिती ठाकरे गटाचे सह संपर्कप्रमुख दत्ता गायकवाड यांनी दिली आहे.
ज्यांच्यामुळे हा गुन्हा दाखल झाला आहे ते आज आमच्या सोबत नाही हे आमचं दुर्दैव आहे. आम्ही शिवसैनिक आहोत. आदेशावर चालणारे लोक आहोत. आम्हाला उद्धव साहेबांनी आदेश दिलेत, हा आपला उमेदवार आहे. आम्ही एकदा नाही दोन वेळा काम केलं, हे आमचं दुर्दैव आहे, असे म्हणत नाशिक लोकसभा मतदार संघाचे खासदार हेमंत गोडसे यांच्यावर निशाणा साधत दत्ता गायकवाड यांनी संताप व्यक्त केला.