बॉक्स ऑफिसवर चालली श्रद्धा आणि रणबीरची जादू, तू झुठी मैं मक्कारनं पहिल्याच दिवशी केली बक्कळ कमाई

मुंबई: शाहरुख खानच्या ‘पठाण’नं मिळवलेल्या जबरदस्त यशामुळं बॉलिवूडमध्ये चैतन्याचं वातावरण निर्माण झालं. मात्र त्यानंतर प्रदर्शित झालेल्या कार्तिक आर्यनच्या ‘शहजादा’कडं प्रेक्षकांनी पाठ फिरवली. त्यामुळं ‘तू झूठी मैं मक्कार’चं नेमकं काय होणार? याकडं प्रेक्षकांचं लक्ष लागलं होतं. रणबीर कपूर आणि श्रद्धा कपूर यांच्या या चित्रपटाची प्रेक्षक आतुरतेनं वाट पाहत होते. ८ मार्च रोजी हा चित्रपट प्रदर्शित झाला. श्रद्धा आणि रणबीरची जोडी प्रेक्षकांना प्रचंड आवडली असून बॉक्स ऑफिसवरही चित्रपटानं चांगली कमाई केली आहे.

रणबीर कपूर आणि श्रद्धा कपूरच्या या तू झूठी मैं मक्कार चित्रपटातील गाण्यालाही प्रेक्षकांनी डोक्यावर घेतलं आहे. होळीच्या मुहूर्तावर चित्रपट प्रदर्शित करण्याचा निर्मात्यांचा निर्णय अगदी योग्य ठरला असं म्हटलं जात आहे. रणबीर आणि श्रद्धाच्या तू झूठी मैं मक्कार या चित्रपटानं पहिल्याच दिवशी तब्बल १५.७३ कोटींची कमाई केली आहे.
अरुंधती दुसऱ्याशी लग्न करून गेली ही माझी सगळ्यात मोठी हार; अजूनही अनिरुद्धचा होतोय संताप
दमदार ओपनिंगमुळं चित्रपट पुढचे काही आठवडे चांगली कमाई करेल, असं म्हटलं जात आहे. या चित्रपटानं कार्तिक आर्यनच्या ‘भूल भुलैय्या २’ चित्रपटालाही कमाईच्या बाबतीत मागं टाकलं आहे. लव्ह रंजन फिल्मच्या अकाऊंटवर एक फोटो शेअर करत ओपनिंगचे आकडे सांगण्यात आले आहेत.

श्रद्धा आणि रणबीरची लव्हस्टोरी आणि…
खोटेपणा आणि लबाडीचा कित्ता गिरवत श्रद्धा आणि रणबीरची ही लव्हस्टोरीची गाडी पुढं सरकत असते. फ्लर्टिंगपासून त्यांची कहाणी सुरू होते ते खरोखर प्रेमात पडल्यानंतर खरं कथानक सुरू होतं. या नात्यातून बाहेर पडायचं आहे की नाही अशा कथानकाभोवती ही लव्ह स्टोरी आहे. या दरम्यान दोघांकडूनही खोटेपणा आणि लबाडीचा मोठा रंजक खेळ खेळला जातो. यामध्ये त्यांच्यातील रोमँटिक अंदाजही पाहायला मिळतो. शिवाय रोमान्सला कॉमेडीचा जबरदस्त तडकाही दिलेला आहे.

अक्षयचा ‘सेल्फी’ आपटला
दरम्यान, काही आठवड्यांपूर्वी प्रदर्शित झालेला अक्षय कुमार आणि इम्रान हाश्मी यांच्या ‘सेल्फी’ या सिनेमाचं मोठ्या दणक्यात प्रमोशन करण्यात आलं होतं, मोठ्या धुमधडाक्यात सिनेमा प्रदर्शितही झाला मात्र अक्षयच्या या सिनेमाला पहिल्याच दिवशी प्रेक्षकांनी नाकारल्याचं चित्र होतं.’ड्रायव्हिंग लायसन्स’ या मल्याळम चित्रपटाचा ‘सेल्फी’ हा रिमेक असून हा सिनेमा अक्षयच्या करिअरमधील सर्वात वाईट ओपनिंग कमाई करणारा चित्रपट ठरलाय.