Tej Police Times
मुंबई: बॉलिवूडचा सिंघम अभिनेता अजय देवगण आणि अभिनेत्री तब्बू यांच्या मुख्य भूमिका असलेला ‘भोला’ सिनेमा ३० मार्च रोजी प्रदर्शित झाला. गुरुवारी प्रदर्शित झालेल्या या सिनेमाला म्हणावी तितकी चांगली ओपनिंग करता आली नाही. ३० मार्च रोजी रामनवमीनिमित्त देशभरातील विविध राज्यांमध्ये सुट्टी असते, मात्र याचाही फायदा ‘भोला’ला झालेला दिसत नाहीये. सिनेमागृहांमध्ये मॉर्निंग शोच्या तर ९० टक्के सीट्स रिकाम्या होत्या. अजयच्या या बहुचर्चित सिनेमाचे आगाऊ बुकिंगही म्हणावे तितके चांगले झाले नव्हते, त्यामुळे पहिल्या दिवसाच्या कमाईचा आलेख तसा कमीच राहील अशी अपेक्षा होती. मात्र दुपारी आणि संध्याकाळच्या शोमध्ये हे चित्र बदलले असावे अशी अपेक्षा आहे. मात्र एकंदरित ‘भोला’ची पहिल्याच दिवशी बॉक्स ऑफिसवर निराशा झाली आहे, असे म्हटले तरी वावगे ठरणार नाही.
४००० स्क्रिनवर प्रदर्शित झाला सिनेमा
४००० स्क्रिनवर प्रदर्शित झाला सिनेमा
अजयचा भोला देशभरातील ४००० स्क्रिनवर प्रदर्शित झाला आहे. तामिळ सिनेमा ‘कैथी’चा रिमेक असणारा भोला अभिनेता अजय देवगणनेच दिग्दर्शित केला आहे. सिनेमातील अॅक्शन सीनवरही जबरदस्त मेहनत घेण्यात आली आहे. ट्रेलरमध्ये या दृश्यांची भव्यता दिसून आली होती. मात्र रीलिजनंतर सिनेमाच्या स्क्रिनप्लेचे विशेष कौतुक होताना दिसले नाही. रामनवमीनिमित्त विविध राज्यांमध्ये सुट्टी असते, परिणामी यादिवशी भोला चांगली कमाई करेल अशी अपेक्षा होती. यूपी, राजस्थान आणि मध्य प्रदेश या राज्यांमध्ये सुट्टी असूनही सिनेमाची ओपनिंग चांगली झाली नाही.
महाराष्ट्र-गुजरातमध्येही हाल-बेहाल
महाराष्ट्र आणि गुजरातमध्येही अशीच परिस्थिती होती. हिंदी भाषिक राज्यांमध्येच सिनेमाला चांगले ओपनिंग मिळालेले नाही. करोनापूर्वी जितका प्रेक्षकवर्ग सिनेमा पाहण्यासाठी थिएटरमध्ये येत असे, त्यापेक्षा कमी प्रतिसाद अजयच्या या सिनेमाला पहिल्या दिवशी मिळाला आहे. मात्र असे असले तरी सिनेमा शुक्रवार ऐवजी गुरुवारी प्रदर्शित झाल्याने चार दिवसांचा एक्सटेंडेड वीकेंड या सिनेमाला मिळाला आहे. शनिवार-रविवारी सिनेमाची कमाई वाढेल, अशी अपेक्षा व्यक्त केली जात आहे. जरी सुरुवात धीम्या गतीने झाली असली तरी येत्या दोन-तीन दिवसात भोला किती कमाई करेल याकडे लक्ष लागून राहिले आहे.
आगाऊ बुकिंगमध्ये कमावले अवघे २ कोटी
‘भोला’प्रमाणे अजयचा ‘दृश्यम २’देखील दाक्षिणात्य सिनेमाचा रीमेक आहे, मात्र तो २०० कोटींच्या क्लबमध्ये पोहोचला. भोलाचे आगाऊ बुकिंग ११ दिवसांपूर्वी सुरू झालेले, मात्र प्रदर्शित होण्याच्या एक दिवस आधीपर्यंत १०० कोटींचे बजेट असणाऱ्या भोलाने अवघे २-२.२५ कोटीच कमावले. दृश्यम २चे आगाऊ बुकिंग ६.५ कोटींचे झाले होते. आणखी एक महत्त्वाची बाब म्हणजे ‘भोला’चा मूळ दाक्षिणात्य सिनेमा ‘कैथी’चे हिंदी व्हर्जन आधीपासून ओटीटीवर आहे. त्यामुळे प्रेक्षकांना भोलाची कथा माहीत आहे. परिणामी अजयच्या भोलाकडे प्रेक्षकांनी पाठ फिरवली.
करोना झाल्यामुळे शिल्पा शेट्टीच्या नवऱ्याची उडवली जातेय खिल्ली; वाचा नेमकं काय घडलं?
१० कोटी कमावण्याच्याही मारामार
गुरुवारी रीलिज झालेल्या भोलाचे मॉर्निंग शोज पाहता दुहेरी आकड्यामध्ये कमाई करणेही कठीण आहे. जर दुपारी आणि संध्याकाळच्या शोसाठी प्रेक्षक पोहोचले तर भोला १२-१३ कोटींची कमाई करू शकतो, अन्यथा या सिनेमाला पहिल्या दिवशी ८-१० कोटींवरच समाधान मानावे लागेल. याआधी अजयच्या ‘दृश्यम २’ ने पहिल्या दिवशी १४.९२ कोटींची कमाई केली होती. तर ३.५ कोटींच्या आगाऊ बुकिंगसह ‘तू झुठी में मक्कर’ने १४ कोटी रुपयांचे कलेक्शन पहिल्या दिवशी केलेले.
युगला पाहून तुम्हीही म्हणाल हा तर अजय देवगणची कार्बन कॉपी !