RTE Admission: ‘आरटीई’ प्रवेशात तांत्रिक अडचणी, आतापर्यंत केवळ ७५० विद्यार्थी पात्र

आरटीई प्रवेशासंबंधी दर वर्षी तांत्रिक अडचणी येत असतात. यंदाही या प्रक्रियेमध्ये अडचणींचा पाढा वाचला गेला आहे. शिक्षण हक्क कायद्यांतर्गत (आरटीई) शहरातील खासगी शाळांमध्ये आर्थिक दुर्बल घटकांसाठी राखीव २५ टक्के जागांवरील प्रवेश प्रक्रिया लागू असणाऱ्या शाळांची नोंदणी प्रक्रिया २३ जानेवारी रोजी झाली. अर्ज भरताना अनेक अडचणी येत असल्याने त्यासाठी पालकांनी खास वेळ काढला होता. काही पालकांनी खास सुट्टी घेतली होती.

यापूर्वी दर वर्षी वेबसाइट सुरू होत नसल्याने किंवा इतर तांत्रिक अडचणींमुळे पालकांना अर्ज भरण्यास असंख्य अडचणींचा सामना करावा लागतो. या वेळीदेखील वेबसाइट दुपारी तीननंतर थोडा वेळ सुरू होऊन, नंतर बंद पडली. त्यामुळे पालकांना पहिल्या दिवसापासून अर्ज भरता आले नाहीत.

अर्ज भरल्यानंतर आता या अर्जांच्या छाननीला ८ मेपर्यंत मुदतवाढ मिळाली आहे. आरटीई प्रवेशासाठी १२ एप्रिलपासून पालकांना मेसेज जाऊ लागले. मात्र, त्यानंतर पुढील आठ दिवस तांत्रिक अडचणींमुळे पालकांना वेबसाइटवरून कागदपत्रे अपलोड करताना अडचणी आल्या.

पडताळणी प्रक्रिया

– विद्यार्थ्यांच्या अर्जांची पडताळणी सुरू आहे.

– त्यायामध्ये उत्पन्न दाखला, गुगल मॅपवरून पत्ता पडताळणी

– सध्या पिंपरी आणि आकुर्डी येथून एकूण ७५० विद्यार्थी पात्र झाले आहेत.

– ३५० पिंपरीचे, तर ४०० आकुर्डी विभागातील विद्यार्थी आहेत.

‘अडचण आल्यास संपर्क साधा’

आरटीई अर्जासंबंधी कोणतीही अडचण असल्यास थेट माझ्याशी संपर्क साधावा, असे आवाहन प्रशासन अधिकारी संजय नाईकडे यांनी केले आहे. त्यामुळे पालकांची कोणतीही गैरसोय होऊ नये असा शिक्षण विभागाचा हेतू आहे.

दर वर्षीप्रमाणे यंदादेखील तांत्रिक अडचणी आल्या. वेबसाइटवर ताण आल्याने नेहमीच पालकांची धावपळ होते. यंदा पालकांना एसएमएस उशिरा आले. त्यामुळे गोंधळ उडाला. यंदाची प्रक्रिया पूर्ण कधी होईल याची वाट पालक पाहत आहेत.
– शरण शिंगे, उपाध्यक्ष, आरटीई पालक संघ, पिंपरी-चिंचवड