आश्रमशाळा शिक्षकांच्या मानधनात वाढ

शालेय शिक्षण विभागाकडून ‘शिक्षण सेवक योजना’ कार्यान्वित केलेली आहे. त्यानुसार विमुक्त जाती, भटक्या जमाती प्रवर्गाच्या आश्रमशाळांना लागू केलेली आहे. त्यानुसार इतर मागास बहुजन कल्याण विभागामार्फत चालविण्यात येणाऱ्या ‘विजाभज’ प्रवर्गाच्या प्राथमिक, माध्यमिक, उच्च माध्यमिक आश्रमशाळा, विद्यानिकेतन तसेच ऊसतोड कामगारांच्या मुला-मुलींसाठीच्या आश्रमशाळांमध्ये शिक्षण सेवकपदी नियुक्ती करण्यात आलेली आहे.

नियुक्तीच्या दिनांकापासून कर्मचाऱ्यांना प्रथम तीन वर्षांसाठी शासनाने निश्चित केलेल्या दरानुसार मानधन दिले जाते. हे मानधन अतिशय तुटपुंजे असल्याने, शासनाने राज्यातील शालेय शिक्षण व क्रीडा विभागाच्या आस्थापनेवरील शिक्षक सेवकांच्या मानधनात वाढ करण्याचा निर्णय घेतला आहे.

वाढीव मानधन जानेवारीपासून
वाढत्या महागाईच्या पार्श्वभूमीवर खासगी तसेच शासकीय पातळीवर वेतनवाढ व भत्त्यांमध्ये वाढ करण्याची मागणी सातत्याने केली जात होती. परंतु, राज्यात इतर मागास बहुजन कल्याण विभागाच्या अधिनस्त असलेल्या व स्वयंसेवी संस्थांमार्फत चालविल्या जाणाऱ्या आश्रमशाळांतील शिक्षणसेवकांना यापूर्वी निश्चित केल्यानुसारच मानधन दिले जात होत. त्यामुळे याबाबत शासनाने नुकताच निर्णय पारित केला असून, जानेवारीपासून शिक्षकांना वाढीव मानधन दिले जाणार आहे.

शिक्षण सेवकांचा वर्ग आधीचे मानधन सुधारित मानधन (रुपयांमध्ये)

प्राथमिक व उच्च प्राथमिक ६,००० १६,०००

माध्यमिक ८,००० १८,०००

उच्च माध्यमिक / कनिष्ठ महाविद्यालय ९,००० २०,०००