Tej Police Times
मराठीतल्या सहाजणी बॉलीवूडला भिडल्या! बाईपण भारी देवाची जबराट कामगिरी; वाचा तीन दिवसांची कमाई
मुंबई– मराठी चित्रपटसृष्टीला वेगळ्या उंचीवर नेऊन ठेवणारे, छोट्या छोट्या गोष्टींमधून मोठे विषय मांडणारे लोकप्रिय दिग्दर्शक केदार शिंदे यांचा ‘बाईपण भारी देवा’ हा चित्रपट नुकताच प्रदर्शित झाला. स्त्रियांच्या भावविश्वावर आधारित या चित्रपटाकडून प्रेक्षकांच्या बऱ्याच अपेक्षा होत्या. मराठी विरुद्ध बॉलिवूड आणि दाक्षिणात्य चित्रपट असा वाद सुरू असताना मराठी चित्रपट बॉक्स ऑफिसवर कशी कामगिरी करतोय याकडे प्रत्येकाचं लक्ष लागलं होतं. आता केदार शिंदे यांनी त्यांच्या टीमने या अपेक्षा सार्थ ठरवल्या आहेत. ‘बाईपण भारी देवा’ या चित्रपटाने बॉक्स ऑफिसवर चांगली कामगिरी केली आहे. बॉलिवूड चित्रपटांच्या तुलनेत मराठी चित्रपटाने पुन्हा एकदा आपलं वेगळेपण सिद्ध केलं आहे. चित्रपटाने पहिल्या तीन दिवसातच कोटींचा गल्ला जमवला आहे.
या आठवड्यात गेल्या आठवड्यात ‘बाईपण भारी देवा’, ‘सत्यप्रेम की कथा’ आणि ‘कॅरी ऑन जट्टा ३’ हे चित्रपट प्रेक्षकांच्या भेटीला आले. हे तिन्ही चित्रपट प्रेक्षकांच्या पसंतीस पडत आहेत. मात्र त्यातही मराठी चित्रपटाकडे प्रेक्षकांचा ओढा जास्त दिसून येत आहे. या चित्रपटात रोहिणी हट्टंगडी, वंदना गुप्ते, सुकन्या मोने, सुचित्रा बांदेकर, शिल्पा नवलकर आणि दीपा चौधरी महत्वपूर्ण भूमिकेत दिसत आहेत. हा चित्रपट म्हणजे सहा बहिणींची कथा आहे. आता या चित्रपटाची कमाई पाहू. ‘बाईपण भारी देवा’ चित्रपटाला प्रेक्षक गर्दी करताना दिसत आहेत. या चित्रपटाचे सर्व शो हाऊसफुल सुरू आहेत. हा चित्रपट चित्रपटगृहात दणदणीत कमाई करताना दिसत आहे. एका वेबसाइटने दिलेल्या वृत्तानुसार, या चित्रपटाने पहिल्या दिवशी १ कोटींची कमाई केली होती. त्यानंतर दुसऱ्या दिवशी चित्रपटाने दुप्पट कमाई केली.
दुसऱ्या दिवशी चित्रपटाने २. १० कोटीचा गल्ला जमवला. तर तिसऱ्या दिवशी म्हणजेच काल या चित्रपटाने २.८० कोटींचा गल्ला जमवला. एकूण चित्रपटाने ५. ९० कोटींची कमाई केली आहे. या चित्रपटाने इतर चित्रपटांना चांगलीच टक्कर दिल्याचं चित्र आहे. सर्वत्र चित्रपटाचं कौतुक होताना दिसत आहे.