Tej Police Times, The first and leading Marathi news web portal of Maharashtra, provides the hard core news to Maharashtrians in their own language. It also has a varied programming mix having Politics, Sports, Entertainment news coverage
‘बाईपण भारी देवा’ने मोडला ‘वेड’चा रेकॉर्ड; ठरला सर्वाधिक कमाई दुसरा मराठी चित्रपट, कमावले तब्बल…
मुंबई– लोकप्रिय दिग्दर्शक केदार शिंदे यांच्या ‘बाईपण भारी देवा’ ने चित्रपटगृहांमध्ये धुमाकूळ घातला होता. बॉक्स ऑफिसवर फक्त ‘बाईपण भारी देवा’ची हवा आहे. जिथे पाहावं तिथे ‘बाईपण भारी देवा’ची चर्चा आहे. या चित्रपटाने आता बॉलीवूडला देखील धूळ चारली आहे. मराठी चित्रपटापुढे आता बॉलिवूडचे अनेक चित्रपट चीतपट झाले आहेत. या चित्रपटाने आतापर्यंत कोट्यवधींची कमाई केली आहे. मात्र आता या चित्रपटाने कमाईच्या बाबतीत लोकप्रिय मराठी अभिनेता रितेश देशमुख याच्या ‘वेड’ या चित्रपटाचा रेकॉर्ड मोडला आहे. सोबतच कमाईच्या बाबतीत हा चित्रपट चक्क मराठी चित्रपटसृष्टीतला सर्वाधिक कमाई करणारा दुसरा चित्रपट ठरला आहे. आता काही दिवसात हा चित्रपट ‘सैराट’चा रेकॉर्ड मोडणार का याकडे प्रेक्षकांचं लक्ष लागलं आहे.
‘बाईपण भारी देवा’नंतर अनेक हिंदी चित्रपट प्रदर्शित झाले. मात्र कुणीही त्याच्यासमोर टिकू शकला नाही. नुकत्याच प्रदर्शित झालेल्या ‘रॉकी और रानी की प्रेम कहानी’ या चित्रपटाला देखील मराठी चित्रपटाने धूळ चारली आहे. सहा बहिणींची कथा असलेल्या या चित्रपटाने पहिल्या आठवड्यातच १२ कोटींची कमाई केली होती. दुसऱ्या आठवड्यात ही कमाई वाढून तब्बल २४ कोटींवर गेली. तिसऱ्या आठवड्यात पुन्हा या चित्रपटाने २१ कोटी आणि चौथ्या आठवड्यात १० कोटींची कमाई केली. आता पुढच्या आठवड्यात मिळून ही कमाई तब्बल ८३ कोटी ५० लाखांवर पोहोचली आहे. ही कमाई आंतरराष्ट्रीय स्तरावरील कमाई आहे. ‘वेड’ ने आंतरराष्ट्रीय पातळीवर मिळून ७५ कोटींची कमाई केली होती.
तर फक्त भारतात या चित्रपटाने तब्बल ७२ कोटी ११ लाखांची कमाई केली आहे. ‘सैराट’ने तब्बल १३० कोटींची कमाई केली होती. आता हा आकडा ‘बाईपण भारी देवा’ गाठू शकणार का याकडे सगळ्यांचं लक्ष लागलं आहे. मात्र फक्त ५ कोटींमध्ये बनलेला ‘बाईपण भारी देवा’ सगळ्यांवर भारी पडलाय हे मात्र खरं.