Tej Police Times
दुसऱ्या दिवशीही बॉक्स ऑफिसवर ‘सुभेदार’चीच हवा; केली पहिल्या दिवसापेक्षा जास्त कमाई, वाचा एकूण आकडा
मुंबई– छत्रपती शिवाजी महाराज यांच्या अष्टकातील पाचवं पुष्प असणारा ‘सुभेदार’ हा चित्रपट नुकताच प्रेक्षकांच्या भेटीला आला. छत्रपती शिवराय आणि त्यांचे बालपणीचे परममित्र तानाजी मालुसरे यांच्यातील मैत्री आणि याच मैत्रीच्या नात्याला जागणारे सुभेदार तानाजी मालुसरे यांची शौर्यगाथा दाखवणारा हा चित्रपट २५ ऑगस्ट रोजी प्रदर्शित झाला. या चित्रपटाकडून प्रेक्षकांना प्रचंड अपेक्षा होत्या. आणि आता त्या अपेक्षा पूर्ण होताना दिसतायत. ‘सुभेदार’ हा चित्रपट प्रेक्षकांच्या पसंतीस उतरतोय. चित्रपटातली प्रत्येक फ्रेम प्रेक्षकांचं मन जिंकून घेतेय आणि त्यामुळेच प्रेक्षक चित्रपटगृहाबाहेर गर्दी करताना दिसत आहेत. प्रदर्शनाच्या अवघ्या दोन दिवसात या चित्रपटाने कोट्यवधींची कमाई केली आहे.
शुक्रवारी प्रदर्शित झालेल्या या चित्रपटाची सध्या माऊथ पब्लिसिटी सुरू आहे. हा चित्रपट आवडल्याने प्रेक्षक त्याचं आता मनापासून कौतुक करत आहेत. पहिल्याच दिवशी चित्रपटाला उत्स्फूर्त प्रतिसाद मिळाला. पहिल्याचं दिवशीही या चित्रपटाने बॉक्स ऑफिसवर १ कोटी ५ लाखांची कमाई करत साग्ळ्यांनाच आश्चर्याचा धक्का दिला होता. आता दुसऱ्या दिवशी या चित्रपटाने पहिल्या दिवसापेक्षाही जास्त कमाई केली आहे. दुसऱ्या दिवशी म्हणजे शनिवारी अनेक ठिकाणी शो हाऊसफुल असल्याचे दिसून आले. या चित्रपटाने दुसऱ्या दिवशी तब्बल १ कोटी ७५ लाखांची कमाई केली असल्याचं सांगण्यात येतंय. एका वेबसाइटने ही माहिती दिली आहे. त्यामुळे आतापर्यंत या चित्रपटाने २ कोटी ८० लाखांचा गल्ला जमवला आहे. दोन दिवसात हा चित्रपट ३ कोटींच्या आसपास पोहोचला आहे.
आता रविवारीही हा चित्रपट चांगली कमाई करेल असा अंदाज लावण्यात येत आहे. त्यामुळे या वीकेंडला ‘सुभेदार’ ४ कोटींचा आकडा पार करणार का याकडे सगळ्यांचं लक्ष लागलं आहे.