‘mail.ru’ काय आहे ज्यावरून दिल्लीतल्या शाळांना आली बॉम्ब स्फोटाची धमकी? जाणून घ्या

बुधवारी सकाळी दिल्ली-एनसीआर परिसरातील सुमारे १०० शाळांना एक ईमेल आला. या ई-मेलच्या माध्यमातून या शाळांना बॉम्बने उडवण्याची धमकी देण्यात आली आहे. बातमी समोर आल्यानंतर विद्यार्थी आणि पालक घाबरले आणि शाळा बंद करण्यात आल्या. दिल्ली पोलिसांची सायबर टीम या प्रकरणाचा तपास करत आहे. मीडिया रिपोर्टनुसार बॉम्ब स्फोटाची धमकी देणारे ई-मेल रशियावरून पाठवण्यात आले होते. यात डोमेन ‘mail.ru’ वरून शाळांना ई-मेल पाठवण्यासाठी एकाच आयपी अ‍ॅड्रेसचा वापर करण्यात आला आहे. तसेच अशाप्रकारचे ई-मेल पाठवताना खरा आयपी अ‍ॅड्रेस लपवण्यासाठी बऱ्याचदा VPN कनेक्शनचा वापर केला जातो.

Mail.ru म्हणजे काय?

mail.ru रशियन वेबमेल सर्व्हिस आहे, जी १९९८ मध्ये लाँच करण्यात आली होती. ही रशिया आणि युरोपातील सर्वात मोठी वेबमेल प्रोव्हायडर आहे. या सर्व्हिसवर १०० मिलियन पेक्षा जास्त अ‍ॅक्टिव्ह ई-मेल अकाऊंट्स आहेत. ही जगातील पाचवी सर्वात मोठी मेल प्रोव्हायडर आहे. याचा अर्थ असा नाही की इतर देशांतील लोक ही सर्व्हिस वापरू शकत नाहीत. जगभरात कोणीही कुठूनही ही सर्व्हिस वापरू शकतं, ज्याप्रकारे जीमेल, याहू मेल इत्यादी वापरता येतात.

रशियातून धमकीचे ई-मेल आले का?

वर सांगितल्याप्रमाणे असे धमकीचे ई-मेल पाठवण्यासाठी व्हीपीएन कनेक्शनचा वापर केला जातो. यामुळे ई-मेल पाठवणाऱ्या व्यक्तीचा मूळ आयपी अ‍ॅड्रेस दिसत नाही. त्यामुळे हा ई-मेल रशियातून आला असेलच असं म्हणता येईल. भारतात किंवा इतर कोणत्याही देशातून हा ई-मेल पाठवला जाऊ शकतो, व्हीपीएनवर लोकेशन रशिया सेट केल्यास तिथून मेल आल्याचं दिसत असावं.

आयपी अ‍ॅड्रेसचा शोध सुरु

प्रकरणाचा तपास करत असलेल्या पोलिसांची टीम त्याच आयपी अ‍ॅड्रेसचा शोध घेत आहे, ज्यावरून हा मेल पाठवण्यात आलंय. हा अ‍ॅड्रेस मिळताच ई-मेल पाठवणाऱ्या व्यक्तीचा शोध घेणं सोपं होईल. तसेच ही खरंच धमकी आहे की कोणी मस्करी केली आहे, याचा तपास देखील पोलीस करत आहेत. सध्या देशात निवडणुकीचं वातावरण असल्यामुळे या धमकीकडे दुर्लक्ष करून देखील चालणार नाही.