सरकारनेच सुरु केलं डेटिंग अ‍ॅप; कुंडली नव्हे कागदपत्र पाहून जुळणार जोड्या

टोकियो मेट्रोपॉलिटन सरकार लवकरच आपलं डेटिंग अ‍ॅप लाँच करेल. ही मोहीम कमी होत असलेला राष्ट्रीय जन्मदर वाढवण्यासाठी सरकारच्या प्रयत्नानांचा एक भाग आहे. हे अ‍ॅप जॉईन करण्यापूर्वी युजरला काही अटी पूर्ण कराव्या लागतील. जपानमध्ये नगर पालिकेमार्फत मॅचमेकिंग प्रोग्राम आयोजित करणे नवीन नाही. परंतु स्थानिक सरकारद्वारे अ‍ॅप डेव्हलप करणे दुर्मिळच आहे. जगातील सर्वात श्रीमंत व्यक्ती आणि सोशल मीडिया एक्सचे मालक इलॉन मस्क यांना देखील जपानची ही आयडिया आवडली आहे आणि त्यांनी याबाबत एक ट्वीट केलं आहे.

युजर्सना पूर्ण कराव्या लागतील या अटी

मीडिया रिपोर्टनुसार युजर्सना आपण कायद्याने सिंगल असल्याचं सिद्ध करण्यासाठी कागदपत्र सबमिट करावे लागतील. त्यांना एका लेटरवर सही करावी लागेल, ज्यात लिहलं असेल की ते लग्नासाठी तयार आहेत. जपानी डेटिंग अ‍ॅप्सवर आपली कमाई सांगणे सामान्य आहे, परंतु टोकियो अ‍ॅपमध्ये अ‍ॅन्युअल इनकम सिद्ध करण्यासाठी टॅक्स सर्टिफिकेट आवश्यक असेल. टोकियो अ‍ॅपसाठी रजिस्ट्रेशन प्रक्रियेचा भाग म्हणून युजरची ओळख पटवण्यासाठी एक इंटरव्यू आवश्यक असेल. हे अ‍ॅप गेल्यावर्षी पासून फ्री टायलवर सुरु आहे.

नवीन अ‍ॅपची जबाबदारी सांभाळणार्या टोकियो सरकारच्या एका अधिकाऱ्यांनी सांगितलं की, “आम्हाला माहिती मिळाली आहे की लग्नासाठी 70 टक्के इच्छुक लोक कोणत्याही इव्हेंट किंवा अ‍ॅपशी जोडले जाऊन जोडीदाराचा शोध घेण्यात सक्रिय नाहीत. आम्ही त्यांना जोडीदार शोधण्यासाठी मदत करू पाहत आहोत.”
Paasport तयार करणे होईल सोपे, या ॲपच्या मदतीने कागदपत्रांशिवाय होणार काम

इलॉन मस्कला आवडली आयडिया

सोशल मीडिया प्लॅटफॉर्म एक्सचे मालक आणि स्पेसएक्सचे सीईओ इलॉन मस्क यांनी देखील जपानच्या या मोहिमेचे कौतुक केले आहे. याबाबत एका ट्वीटला उत्तर देताना त्यांनी म्हटलं आहे की त्यांना बरं वाटत आहे की जपाननं याचे महत्व ओळखले आहे. जर ठोस कारवाई केली गेली नाही तर जपान (आणि इतर अनेक देश) गायब होतील.

जपानमध्ये जन्मदरात घट

मीडिया रिपोर्टनुसार, गेल्यावर्षी जपानमध्ये नवीन जन्मलेल्या अर्भकांच्या तुलनेत दुप्पट मृत्यूंची नोंद झाली होती. सरकारी आकडेवारीनुसार गेली आठ वर्ष जन्मदरात 5.1 टक्क्यांची घट झाली आहे. गेल्यावर्षी 7,58,631 मुलं जन्माला आली तर मृतांची संख्या 1,590,503 होती.