Tej Police Times
जान्हवी कपूरच्या सिनेमावर भारी पडला मराठमोळ्या दिग्दर्शकाचा ‘मुंज्या’; पहिल्याच दिवशी दणक्यात कमाई
मुंबई: हॉरर-कॉमेडी सिनेमा असणाऱ्या ‘मुंज्या’ या सिनेमाने पहिल्याच दिवशी प्रेक्षकांचे लक्ष वेधून घेण्यात यश मिळवले आहे. मराठमोळा दिग्दर्शक आदित्य सरपोतदारचे दिग्दर्शन असणारा ‘मुंज्या’ हा चित्रपट ७ जून रोजी प्रदर्शित झाला आणि सिनेमाने पहिल्याच दिवशी धमाकेदार कमाई केली. ट्रेलरला चांगला प्रतिसाद मिळाल्यानंतर हा सिनेमा पहिल्या दिवशी साधारण १-२ कोटी कमावेल अशी अपेक्षा होती, मात्र ‘मुंज्या’ने सर्वांच्या अपेक्षांपलीकडे जात ४ कोटींहून अधिक कमाई केली आहे. ‘मिस्टर अँड मिसेस माही’ या गेल्या आठवड्यात प्रजर्शित झालेल्या सिनेमापेक्षा या शुक्रवारी ‘मुंज्या’ने तीन पट अधिक कमाई केली.’स्त्री’ आणि ‘भेडिया’सारख्या सिनेमांची निर्मिती करणाऱ्या दिनेश विजान आणि अमर कौशिक यांनी ‘मुंज्या’ची निर्मिती केली आहे. सिनेमात अभय वर्मा आणि शर्वरी वाघ यांची मुख्य भूमिका आहे. शर्वरीसह अनेक मराठी कलाकार या सिनेमात आहेत. sacnilk च्या रिपोर्टनुसार, शुक्रवारी सकाळी सिनेमाच्या शोमध्ये जवळपास ११ टक्के सीटवर प्रेक्षक आले होते, यामध्ये रात्रीपर्यंत ३७ टक्केपर्यंत वाढ झाली. कोणताही बडा स्टार नसताना ‘वर्ड ऑफ माऊथ’मुळे सिनेमाला लोकप्रियता मिळाली आहे.
मराठी कलाकारांची फौज
या सिनेमात शर्वरी-अभय यांच्यासह मोना सिंग, एस. सत्यराज, ज्येष्ठ अभिनेत्री सुहास जोशी, महाराष्ट्राची हास्यजत्रा फेम रसिका वेंगुर्लेकर, भाडिपा फेम भाग्यश्री लिमये हे कलाकारदेखील आहेत. २४ मे रोजी ट्रेलर समोर आल्यानंतरच सिनेमाची हवा पाहायला मिळाली होती. अनेक मराठी कलाकारांनी आदित्यला त्याच्या या नव्या बॉलिवूड प्रोजेक्टसाठी शुभेच्छाही दिल्या होत्या. आता हा सिनेमा बॉक्स ऑफिसवर चांगली कामगिरी करताना दिसतो आहे.
पहिल्याच दिवशी दणक्यात कमाई
बिझनेस अनालिस्ट तरण आदर्श यांनी दिलेल्या माहितीनुसार मुंज्याने पहिल्या दिवशी ४.२१ कोटींची कमाई केली आहे. सुरुवातच दणक्यात झाल्याने वीकेंडला आदित्य सरपोतदारचा ‘मुंज्या’ आणखी चांगली कमाई करेल अशी अपेक्षा व्यक्त केली जाते आहे. आदित्यनेही या कमाईबद्दलची पोस्ट शेअर केली आहे. त्याने या इन्स्टाग्राम पोस्टमधून प्रेक्षकांचे आभार मानले.
‘मिस्टर अँड मिसेस माही’ची गती मंदावली
तर दुसऱ्या शुक्रवारी गेल्या आठवड्यात प्रदर्शित झालेल्या ‘मिस्टर अँड मिसेस माही’ या सिनेमाची गती काहीशी मंदावल्याचे पाहायला मिळाले. राजकुमार राव आणि जान्हवी कपूर यांची मुख्य भूमिका असणाऱ्या या स्पोर्ट्स ड्रामाने शुक्रवारी १.३१ कोटींची कमाई केली आहे. आतापर्यंत ‘मिस्टर अँड मिसेस माही’च्या खात्यात २६.२० कोटी रुपये जमा झाले आहेत.