‘मुंज्या’च्या कमाईत दुसऱ्या दिवशी कमालीची वाढ; मराठी कलाकारांचा हिंदी सिनेमा ठरतोय चर्चेचा विषय

मुंबई: आदित्य सरपोतदार दिग्दर्शित ‘मुंज्या’ हा सिनेमा प्रेक्षकांना थिएटरकडे आकर्षित करुन घेण्यात यशस्वी ठरला आहे. कोणताही सुपरस्टार या सिनेमात नसताना कमाल अभिनयाच्या जोरावर ‘मुंज्या’मधील कलाकारांनी अवघ्या २ दिवसांत प्रेक्षकांच्या मनावर अधिराज्य केले आहे. अभय वर्मा आणि शर्वरी वाघ यांची मुख्य भूमिका असणारा ‘मुंज्या’ हा बॉलिवूड चित्रपट ७ जून रोजी प्रदर्शित झाला. पहिल्याच दिवशी या सिनेमाने अपेक्षेपेक्षा दुप्पट कमाई करत सर्वांना आश्चर्यचकित केले होते. पहिल्या दिवशी सिनेमाने ४.२१ कोटींची कमाई केली. ‘मिस्टर अँड मिसेस माही’ या जान्हवी कपूर-राजकुमार राव सिनेमाची टक्कर असतानाही ‘मुंज्या’ने जबरदस्त कमाई केली.या सिनेमाला ‘वर्ड ऑफ माऊथ’चा सर्वाधिक फायदा मिळाला. शिवाय यामध्ये वापरण्यात आलेले CGI प्रेक्षकांना विशेष आवडले आहे. चिपळुणमधील एका गावात घडलेली ही कथा चाहत्यांना आकर्षित करते. त्याठिकाणी असणारं चेटुकवाडी अन् मुंज्याचं रहस्य प्रेक्षकांना खिळवून ठेवते. शिवाय ‘झपाटलेला’, ‘पछाडलेला’ अशा हॉरर कॉमेडी सिनेमांसारखी विनोदी स्टाइल ‘मुंज्या’मध्येही पाहायला मिळते. जाणून घ्या किती झाली कमाई?

‘मुंज्या’ची दुसऱ्या दिवसाची कमाई

‘मुंज्या’ने पहिल्या दिवशी ४.२१ कोटींची कमाई केली होती. तर दुसऱ्या दिवशी सुरुवातीच्या आकडेवारीनुसार, सिनेमाने ६.७५ कोटींची कमाई केली आहे. Sacnilk ने ही आकडेवारी दिली असून अद्याप पूर्ण आकडेवारी समोर येणे बाकी आहे. यानंतर अवघ्या २ दिवसांची कमाई जवळपास ११ कोटींपर्यंत पोहोचली आहे. शिवाय ‘मुंज्या’च्या शोची आणि तिकिट खरेदी करणाऱ्यांची संख्याही वाढत असल्याचे चित्र आहे.

Shreya Bugde: ‘चला हवा येऊ द्या’नंतर श्रेया बुगडेचीही नव्या कार्यक्रमात एन्ट्री; ‘ड्रामा’ करणार अभिनेत्री
‘मुंज्या’ सिनेमाचे दिग्दर्शन आदित्य सरपोतदार यांनी केले आहे, तर ‘स्त्री’ आणि ‘भेडिया’ सारखे चित्रपट देणारे दिनेश विजन आणि अमर कौशिक यांनी याची निर्मिती केली आहे. मोना सिंग, शर्वरी वाघ, अभय सिंग, सत्यराज, सुहास जोशी, भाग्यश्री लिमये, तरन सिंग, अजय पूरकर हे कलाकार या सिनेमात महत्त्वाच्या भूमिकेत आहेत. या सिनेमाचे बजेट ३० कोटी असल्याचे समोर आले आहे.

‘मिस्टर अँड मिसेस माही’ने ९व्या दिवशी २.१५ कोटी कमावले

राजकुमार राव आणि जान्हवी कपूर स्टारर या चित्रपटाने बॉक्स ऑफिसवर ६.७५ कोटींची कमाई करत सुरुवात केली होती. तेव्हापासून हा चित्रपट चांगली कामगिरी करत आहे. मात्र, आठव्या दिवशी या सिनेमाची कमाई सर्वात कमी अर्थात १.३ कोटी झाली. नवव्या दिवशी २.१५ कोटी कमावत बॉक्स ऑफिसवर पुन्हा उसळी घेतली आहे. ‘मिस्टर अँड मिसेस माहीने’ने आतापर्यंत २७.९० कोटी रुपयांची कमाई केली आहे.