‘मुंज्या’ची गाडी सुस्साट! बॉक्स ऑफिसवर अर्धशतक; कार्तिकच्या ‘चंदू चॅम्पियन’शी काँटे की टक्कर

मुंबई: ‘मुंज्या’ या सिनेमाची आतापर्यंत होत असलेली बॉक्स ऑफिसवरील कमाई लक्षात घेता, ‘मुंज्या’ इतक्यात तरी थांबेल अशी चिन्हे नाहीत. दुसऱ्या आठवड्यात या सिनेमाने दणक्यात कमाई केली. शिवाय आतापर्यंतच्या सर्वाधिक कमाईचा रेकॉर्डही केला आहे. ७ जून रोजी ‘मुंज्या’ प्रदर्शित झाल्यानंतर पहिल्या रविवारी ८.४३ कोटींची सर्वाधिक कमाई केली होती. दुसऱ्या रविवारी या सिनेमाने हा रेकॉर्ड मोडला. आता या सिनेमाची एकूण कमाई ५० कोटींच्या पार गेली आहे. १७ जून रोजीही अशीच कमाई झाल्यास, सोमवारी ११व्या दिवशी हा सिनेमा ६० कोटीचा टप्पा गाठू शकेल.

‘मुंज्या’चे अर्धशतक

आदित्य सरपोतदार दिग्दर्शित ‘मुंज्या’ या सिनेमाने दुसऱ्या शनिवारी ६.७५ कोटींची कमाई केली होती. तर दुसऱ्या रविवारी अर्थात १६ जून रोजी ८.७५ कोटींची कमाई केली. आतापर्यंतची ही सर्वाधिक कमाई आहे. यानंतर ‘मुंज्या’ची एकूण कमाई ५५.७५ कोटी झाली आहे. प्रदर्शित झाल्यापासून ‘मुंज्या’ दररोज ४ ते ५ कोटींची कमाई करतो आहे. हेच चित्र आजही पाहायला मिळाल्यास सोमवारी हा सिनेमा ६० कोटींचा टप्पा गाठू शकतो.

मराठमोळ्या दिग्दर्शकाने दिग्दर्शित केलेल्या सिनेमाने ६० कोटींच्या जवळपास पोहोचणारी कमाई केली आहे. यातून हे सिद्ध होते आहे की, कंटेट आवडल्यास प्रेक्षक आपोआप थिएटरकडे वळतील.

Riteish Deshmukh Reel: रितेश-जिनिलिया देशमुखचा व्हिडिओ व्हायरल; अभिनेता म्हणाला- ‘अब की बार नही, हर बार…’

‘मुंज्या’ची प्रत्येक दिवसाची कमाई

७ जून २०२४, पहिला शुक्रवार – ४.२१ कोटी
८ जून २०२४, पहिला शनिवार, ७.४० कोटी
९ जून २०२४, पहिला रविवार- ८.४३ कोटी
१० जून २०२४, पहिला सोमवार- ४.११ कोटी
११ जून २०२४, पहिला मंगळवार- ४.२१ कोटी
१२ जून २०२४, पहिला बुधवार- ४.११ कोटी
१३ जून २०२४, पहिला गुरुवार- ३.९ कोटी
१४ जून २०२४, दुसरा शुक्रवार- ३.७५ कोटी
१५ जून २०२४, दुसरा शनिवार- ६.७५ कोटी
१६ जून २०२४, दुसरा रविरार- ८.७५ कोटी
एकूण कमाई- ५५.७५ कोटी

कार्तिक आर्यनच्या ‘चंदू चॅम्पियन’ने किती कमावले?

‘मुंज्या’ या सिनेमाला कार्तिक आर्यन स्टारर ‘चंदू चॅम्पियन’शी टक्कर द्यावी लागणार आहे. हा सिनेमा १४ जून रोजी प्रदर्शित झाला. या सिनेमाने ओपनिंग डेला ५.४० कोटी कमावले होते. दुसऱ्या दिवशी सिनेमाने ७.७० कोटी कमावले. तिसऱ्या दिवशी रविवारी १६ जून रोजी कमाईत मोठी उसळी पाहायला मिळाली. १६ जून रोजी ‘चंदू चॅम्पियन’ची कमाई ११.०१ कोटी झाली आहे. यानंतर या सिनेमाने एकूण २४.११ कोटी कमावले. पहिल्या सोमवारच्या परिक्षेत ‘चंदू चॅम्पियन’ पास होईल की नाही हे पाहणे महत्त्वाचे ठरेल.