‘मुंज्या’ने कार्तिक आर्यनच्या आणले नाकीनऊ; मराठी कलाकारांच्या सिनेमाची १०० कोटींकडे वाटचाल

मुंबई: गेल्यावर्षी ज्याप्रमाणे बॉलिवूड सिनेमांनी बॉक्स ऑफिसवर कमाई केली होती, तशी शान यंदा पाहायला मिळाली नाही. ज्या चित्रपटांनी चांगली कमाई केली ते अद्याप १०० कोटींचा टप्पा पार करू शकले नाहीत. सध्या कार्तिक आर्यनचा १२० कोटी रुपयांत बनलेला ‘चंदू चॅम्पियन’ प्रदर्शित झाला आहे. चित्रपटाचे जोरदार प्रमोशन करण्यात आले पण बॉक्स ऑफिस ओपनिंग अपेक्षेपेक्षा कमी होते. या चित्रपटाने केवळ ४ कोटींची कमाई केली. चित्रपटाची जादू वीकेंडला पाहायला मिळाली, पण आठवडा सुरू झाल्यानंतर पुन्हा कमाई घटली. तर दुसरीकडे गेल्या १३ दिवसांपासून हॉरर कॉमेडी चित्रपट ‘मुंज्या’ बॉक्स ऑफिसवर अधिराज्य करत आहे.साजिद नाडियादवाला आणि कबीर खान सहनिर्मित ‘चंदू चॅम्पियन’चे प्रेक्षक आणि समीक्षकांकडून कौतुक होते आहे, पण बॉक्स ऑफिसवर चित्रपट अपेक्षेप्रमाणे कामगिरी करत नाहीये. ‘चंदू चॅम्पियन’ ही भारताच्या पहिल्या पॅरालिम्पिक सुवर्णपदक विजेत्या मुरलीकांत पेटकर यांची कथा आहे. अनेक सेलिब्रिटींकडून कार्तिकच्या भूमिकेचे कौतुक केले जात आहे.

५० कोटींच्या जवळ पोहोचला ‘चंदू चॅम्पियन’

sacnilk च्या रिपोर्टनुसार, ‘चंदू चॅम्पियन’ने सहाव्या दिवशी म्हणजेच बुधवारी आतापर्यंतची सर्वात कमी कमाई केली. या चित्रपटाने बुधवारी केवळ ३ कोटी रुपये कमावले. आतापर्यंत या चित्रपटाची एकूण कमाई ३२.७५ कोटी रुपये झाली आहे. तर वर्ल्डवाइड कलेक्शन ४६ कोटीहून थोडे अधिक झाले. परदेशात ‘चंदू चॅम्पियन’ने ६-७ कोटी कमावले आहेत.

‘मुंज्या’ची भयावह कथा प्रेक्षकांच्या पसंतीस

७ जून रोजी प्रदर्शित झालेला मोना सिंग, शर्वरी वाघ, अभय वर्मा यांचा चित्रपट ‘मुंज्या’ बॉक्स ऑफिसवर चांगलाच कमाई करत आहे. हॉरर-कॉमेडी ‘मुंज्या’ ट्रेलर रिलीज होण्यापूर्वीच चर्चेत होता. सुमारे २५-३० कोटी रुपयांच्या बजेटमध्ये बनलेल्या ‘मुंज्या’ चित्रपटातील हॉरर कॉमेडी प्रेक्षकांना आवडली. बजेटपेक्षा दुप्पट कमाई ‘मुंज्या’ने केली आहे.

‘मुंज्या’ची १०० कोटींच्या दिशेने वाटचाल

‘मुंज्या’साठी वीकेंड दमदार होताच, शिवाय आठवड्याच्या दिवसातही सिनेमाने चांगली कमाई केली. मात्र बुधवारी ‘मुंज्या’ने आतापर्यंतचे सर्वात कमी कलेक्शन केले आहे. १३व्या दिवशी या सिनेमाने ३.२५ कोटी रुपये कमावले. यानंतर ‘मुंज्या’ची एकूण कमाई ६८ कोटी रुपये झाली आहे. सिनेमाच्या जगभरातील कमाईबद्दल बोलायचे झाल्यास हा आकडा ८० कोटींपर्यंत पोहोचला आहे. त्यामुळे ‘मुंज्या’ लवकरत १०० कोटी क्लबमध्ये पोहोचू शकतो.