Tej Police Times
बाबो! २३०० रुपये मोजून पाहावा लागेल प्रभासचा सिनेमा; तरी किंगखानच्या ‘जवान’पेक्षा किंमत कमीच
मुंबई: सध्या ‘मुंज्या’, ‘चंदू चॅम्पियन’ या सिनेमांची चर्चा असली तरी लवकरच एका मोठ्या सिनेमाच्या लाटेमध्ये हे चित्रपट बॉक्स ऑफिसवरुन वाहून जाण्याची शक्यता आहे. २७ जून रोजी ‘कल्की २८९८ एडी’ हा सिनेमा प्रदर्शित होणार असून, सिनेमाच्या घोषणेपासूनच तो चर्चेत आहे. नाग अश्विन दिग्दर्शित सिनेमात दाक्षिणात्य आणि बॉलिवूडमधील तगडी स्टार कास्ट पाहायला मिळणार आहे. सिनेमासाठी Advance Booking ज्या पद्धतीने होते आहे, त्यावरुन ‘कल्की २८९८ एडी’ची क्रेझ किती आहे याचा अंदाज बांधता येतो आहे. मुंबईमध्ये सिनेमाचे तिकीट खूप महागडे विकले जात आहे.
बड्या कलाकारांची मांदियाळी
‘कल्की २८९८ एडी’चे सर्वात महागडे तिकीट
शाहरुख खान यामध्येही पुढे
बड्या कलाकारांची मांदियाळी
कल्की २८९८ एडी या सिनेमात बडे स्टार्स आहेत. प्रभास, दीपिका पादुकोण, अमिताभ बच्चन आणि कमल हासन हे कलाकार मुख्य भूमिका साकारणार आहेत. त्यांच्यासह या सिनेमात दिशा पाटनी, शाश्वत चाटर्जी, शोभना, ब्रह्मानंदम हे कलाकारही आहेत. विविध भाषांमध्ये प्रदर्शित होणारा हा सिनेमा दीपिकासाठी तेलुगू भाषेतील पदार्पणाचा सिनेमा आहे. अशीही माहिती आहे की सिनेमात राम गोपाल वर्मा आणि एस एस राजामौली यांचा कॅमिओही आहे. एकंदरीत बडे स्टार आणि मोठ्या बजेटवर हा Sci-Fi सिनेमा प्रेक्षकांच्या भेटीला येतो आहे. त्यामुळे सिनेमासाठी आगाऊ बुकिंगही दणक्यात सुरू आहे.
‘कल्की २८९८ एडी’चे सर्वात महागडे तिकीट
मीडिया रिपोर्टनुसार, वांद्रे-कुर्ला कॉम्प्लेक्समध्ये असणाऱ्या मॅशन आयनॉक्स: जिओ वर्ल्ड प्लाझा याठिकाणी ‘कल्की २८९८ एडी’चे महागडे तिकीट विकले जात आहे. या थिएटरमध्ये ‘कल्की २८९८ एडी’चे २७ जूनसाठीचे ‘लक्स सुपेरियर’ तिकीट २३०० रुपयांना विकण्यात येत आहे. सिनेमाच्या हिंदी व्हर्जनच्या नाइट शोचे एवढे तिकीट आहे. याठिकाणी वीकेंडसाठी २००० रुपयांचीही तिकीटविक्री केली जाते.
शाहरुख खान यामध्येही पुढे
मात्र रंजक बाब अशी की, गेल्यावर्षी सप्टेंबर महिन्यात शाहरुख खानच्या ‘जवान’ सिनेमाच्या तिकिटांची किंमत यापेक्षा अधिक होती. या सिनेमाची तिकिटे २४०० रुपयांना विकली गेली. एटली दिग्दर्शित या सिनेमात शाहरुख खानसह अभिनेत्री नयनतारा मुख्य भूमिकेत होती. दीपिकानेही यामध्ये पाहुण्या कलाकाराची भूमिका साकारली होती.