दाऊदने तिची हत्या कशी केली? घटनाक्रम, कारण अन्… पोलिसांची संतापजनक माहिती

नवी मुंबई: उरण येथील भीषण हत्याकांड प्रकरणातील मुख्य आरोपीला नवी मुंबई पोलिसांनी कर्नाटकातून ताब्यात घेतलं आहे. त्यानंतर अतिरिक्त पोलिस आयुक्त दीपक साकोरे यांनी याबाबतची माहिती दिली. दाऊद शेखला कसं पडकलं, त्याने तरुणीची हत्या कशी केली हा सारा घटनाक्रम पोलिसांनी सांगितला आहे. ताब्यात घेतल्यानंतर प्राथमिक चौकशीत दाऊद शेखने तरुणीच्या हत्येची कबुली दिली आहे. त्याला राज्यात आणल्यानंतर प्रकरणाचे आणखी धागेदोरे उघडतील.

२५ जुलैला ही तरुणी मैत्रिणीकडे जाते असं सांगून घरातून निघाली होती. पण, रात्री उशीर होऊनही ती परतलेली नव्हती. त्यामुळे कुटुंबीयांनी पोलिसांत बेपत्ता असल्याची तक्रार दाखल केली. त्यानंतर दुसऱ्या दिवशी उरणच्या पेट्रोल पंपाजवळ पोलिसांना एका तरुणीचा छिन्नविच्छिन्न अवस्थेतील मृतदेह आढळून आला. तिची ओळख पटवणे कठीण झालं होतं. त्यानंतर कुटुंबीयांनी कपडे आणि टॅटूवरुन ओळख पटवली.
ताब्यात घेताच गुन्ह्याची कबुली; तिला का संपवलं, पोलिसांच्या चौकशीत दाऊद शेखने काय सांगितलं?
२७ जुलैला खुनाचा गुन्हा दाखल झाला आणि या घटनेच्या पाचव्या दिवशी पोलिसांनी मुख्य आरोपीला कर्नाटक येथून अटक केली. पोलिसांची दोन पथकं कर्नाटकात होती. मिळालेल्या टीपवरुन दाऊदला त्याच्या गावातून ताब्यात घेतलं. जेव्हा पोलिसांनी त्याची चौकशी केली तेव्हा त्याने हत्येची कबुली दिली.

हत्येनंतर त्याचं लोकेशन सापडत नव्हतं. तो कर्नाटकचा आहे हे पोलिसांना माहिती होतं. त्यानंतर मिळालेल्या माहितीच्या आधारे पोलिसांनी त्याला कर्नाटकातील शहापुरातील अलधल या गावातून त्याला ताब्यात घेतलं.

मृत तरुणी आणि आरोपीमध्ये मैत्री होती. मध्यंतरी ते तीन-चार वर्ष संपर्कात नव्हते. याच कारणावरुन दाऊदने तिची हत्या केल्याची शक्यता आहे. अद्याप चौकशी पूर्ण झालेली नसून कोणताही निष्कर्ष काढणे चुकीचं असेल असं पोलिसांनी सांगितलं.

त्यादिवशी तरुणी आणि दाऊद हे ठरवून भेटले. ते एकमेकांना ओळखत होते. यात अपरहण झालं असं म्हणता येणार नाही. ते भेटले त्यांच्यात वाद झाला असावा आणि मग हा गुन्हा घडल्याची शक्यता आहे.

तरुणीच्या शरीरावर चाकूने वार करण्यात आले, त्यात तिचा मृत्यू झाला. तर कुत्र्यांनी तिच्या चेहऱ्याचे आणि शरीराचे लचके तोडले असावे, अशी शक्यता असल्याचं पोलिसांनी सांगितलं.