Tej Police Times, The first and leading Marathi news web portal of Maharashtra, provides the hard core news to Maharashtrians in their own language. It also has a varied programming mix having Politics, Sports, Entertainment news coverage
Rajabhau Waje: ठाकरेंनी सामान्य माणूस खासदार करुन पाठवला; लोकसभेत वाजेंचे पहिलेच भाषण फाडफाड इंग्रजीतून, पाहा VIDEO
म. टा. वृत्तसेवा, सिन्नर : नवनियुक्त खासदार राजाभाऊ वाजे यांनी संसदेत नाशिक लोकसभेतील आरोग्य व्यवस्थेबाबत सरकारला तिखट सवाल विचारले. आपले संसदेतील पहिले भाषण थेट इंग्रजीतून करीत सर्वांना आश्चर्यचकित केले. निवडणूक प्रचाराच्या काळात विरोधकांनी त्यांना ग्रामीण पेहरावावरून डिवचले होते. मात्र, संसदेत त्यांनी जिल्ह्यातील आरोग्य सेवेबाबत इंग्रजीतून प्रश्न उपस्थित केले.
आदिवासी भाग आरोग्य सुविधांपासून वंचित
वाजे यांनी संदर्भसेवा रुग्णालय, जिल्हा शासकीय रुग्णालय, ई. एस. आय. सी. रुग्णालय यांच्या अवस्थेबाबत वाजे यांनी सवाल उपस्थित करीत त्यात सुधारणेची मागणी केली. यासह आदिवासी भागात आरोग्य केंद्राच्या फक्त इमारती उभ्या आहेत. परंतु, डॉक्टर-कर्मचारी यांचा अभाव असल्याने आजही आदिवासी भाग आरोग्य सुविधांपासून वंचित असल्याचे वाजे म्हणाले. नाशिक संदर्भसेवा रुग्णालयात केंद्र सरकारच्या एनएचएम आणि एनसीडी योजनेंतर्गत रुग्णांना लाभ मिळावा. तसेच, संदर्भ सेवा रुग्णालयात अत्याधुनिक वैद्यकीय साहित्य तत्काळ उपलब्ध करून देण्यात यावे, अशी मागणी यावेळी करण्यात आली. यासह, नाशिक शासकीय जिल्हा रुग्णालयातही आरोग्य सुविधांचा आढावा घेऊन लवकरात लवकर जिल्हा शासकीय रुग्णालय अधिक बळकट करण्यासाठी प्रयत्नपूर्वक पावले उचलावीत अशीदेखील मागणी यावेळी करण्यात आली
वाजेंची संसदेत मागणी
सातपूर येथील ईएसआयसी रुग्णालयाच्या प्रशासनाकडून होणाऱ्या रुग्णांच्या हेळसांडीबाबत अनेक तक्रारी होत्या. नाशिकच्या दोन ते तीन लाख कामगारांच्या १५ लाखांहून अधिक कुटुंबीयांसाठी आधार असलेले हे रुग्णालय केंद्रीय कामगार मंत्रालयाच्या निधीतून चालवण्यात येते. मात्र, येथील प्रशासनाबाबत मागील काही काळात अनेक तक्रारी असल्याने हे रुग्णालय केंद्रीय आरोग्य मंत्रालयाच्या माध्यमातून चालवण्यात यावे अशी मागणी वाजे यांनी संसदेत केली.
आदिवासी भागातील आरोग्यसेवांकडे वेधले लक्ष
नाशिक लोकसभा मतदारसंघात मोठ्या संख्येने आदिवासीबहुल भाग आहे. याठिकाणी अनेकदा आरोग्य व्यवस्थेच्या ढिसाळ कारभारामुळे अनेक दुर्दैवी घटना घडल्या आहेत. या भागांत आरोग्य विभागाच्या इमारती तर आहेत, मात्र तेथे डॉक्टर, नर्स आणि कर्मचारी उपलब्ध नसल्याकडे त्यांनी लक्ष वेधले.