‘धर्मवीर २’च्या कमाईत जबरदस्त वाढ! अवघ्या दोन दिवसात गाठला मोठा टप्पा

अभिनेता प्रसाद ओक आनंद दिघेंच्या मुख्य भूमिकेत असून अभिनेता क्षितीश दातेही महत्वाची भूमिका निभावतो आहे. तो एकनाथ शिंदेंच्या भूमिकेत असल्याने त्याचे विविध सीन सोशल मीडियावर चांगलेच व्हायरल झाले आहेत. सोशल मीडियावर होत असलेल्या चर्चेदरम्यान सिनेमाची कमाईही लक्ष वेधून घेणारी ठरली. पहिल्या भागाची कमाई सर्वांनाच आश्चर्यचकित करणारी होती, त्यामुळे या चित्रपटाचा दुसरा भाग प्रेक्षकांच्या भेटीला आला आणि निर्मात्यांना या सीक्वेलनेही नाराज केले नाही.

‘राज साहेबांसारखा उमदा वारसदार डावलला गेला तेव्हा…’ धर्मवीर २चा तो सीन यासाठी होतोय व्हायरल

किती आहे धर्मवीर २ ची दोन दिवसांची कमाई?

Sacnilk च्या रिपोर्टनुसार ‘धर्मवीर २ साहेबांच्या हिंदुत्वाची गोष्ट…’ या चित्रपटाबद्दल सुरुवातीला अशी आकडेवारी समोर आलेली की, पहिल्या दिवशी सिनेमाने १.६५ कोटी कमावले आहेत. यामध्ये अपडेट असे आहेत की पहिल्या दिवशी सिनेमाने १.७५ कोटी कमावले. तर दुसऱ्या दिवशीच्या कमाईची सुरुवातीची आकडेवारी २.३० कोटींपर्यंत वाढली आहे. यामध्ये आणखीही वाढ होऊ शकते. आतापर्यंत हाती आलेल्या माहितीनुसार ‘धर्मवीर २’ने अवघ्या २ दिवसात ४.०५ कोटींचा गल्ला जमवला आहे.

मीडिया रिपोर्टनुसार, धर्मवीर २ हा १५ कोटींच्या बजेटमध्ये तयार करण्यात आलेला सिनेमा आहे. बॉक्स ऑफिसवर कमाईची घौडदौड अशीच सुरू राहिल्यास, काहीच दिवसात बजेटएवढी कमाई होण्याची शक्यता आहे. या सिनेमाचे गेल्या काही दिवसात मोठ्या प्रमाणात प्रमोशनही झाले, याचा चांगला फायदा सिनेमाला झाला.