काळाचा असाही महिमा! भाजपच्या दिग्गज नेत्याच्या मतदारसंघातून ४० वर्षांनंतर कमळ गायब

बीडमधील परळी विधानसभा मतदारसंघ भाजपचा बालेकिल्ला म्हणून ओळखला जातो. भाजपचे दिवंगत नेते, माजी उपमुख्यमंत्री गोपीनाथ मुंडे यांच्यामुळी परळी विधानसभेत कमळ फुललं. गोपीनाथ मुंडेंचा मतदारसंघ हीच परळीची ओळख राहिली. त्यांच्या आठवणी सांगताना परळी भाजपमधील अनेक कार्यकर्ते गलबलून गेले. यंदा ईव्हीएमवर कमळ दिसणार नाही. ४० वर्षांत प्रथमच असं घडतंय. याबद्दल वाईट वाटतंय, अशा भावना भाजपच्या कार्यकर्त्यांनी व्यक्त केल्या.
Maharashtra Election 2024: दोन्ही शिवसेनेची एकच मागणी; मविआ, महायुतीची कोंडी; ठाकरे, शिंदेंना नेमकं काय हवंय?
मुंडे साहेबांमुळे परळीला ओळख मिळाली. त्यांच्यामुळेच परळीत आणि राज्यात कमळ पोहोचलं. आता राज्यात भाजप क्रमांक एकचा पक्ष आहे. पण मुंडेंच्याच परळीत कमळ नाही, याचं वाईट वाटतं, अशी खंत कार्यकर्त्यांनी बोलून दाखवली. महायुती असल्यानं आणि इथले विद्यमान आमदार धनंजय मुंडे राष्ट्रवादीचे असल्यानं आम्हाला त्यांचा प्रचार करणं भाग आहे. पंकजा ताईंचा आदेश असल्यानं आम्ही निश्चित त्यांचा प्रचार करु. पण परळीतून कमळ चिन्ह गेल्याचं वाईट वाटतं, अशा शब्दांत भाजपच्या कार्यकर्त्यांनी त्यांच्या भावनांना वाट मोकळी करुन दिली.
Ajit Pawar: दादांनी पाठीत खंजीर खुपसला! मोठी डील झालीय! NCPच्या आमदाराचं खळबळजनक पत्र, पटेलांवर निशाणा
आधी गोपीनाथ मुंडे आणि ते राष्ट्रीय राजकारणात गेल्यावर पंकजा मुंडे परळीतून लढल्या. १९७८ मध्ये गोपीनाथ मुंडे नांगरधारी शेतकरी चिन्हावर निवडणूक लढले होते. १९८० मध्ये भाजपची स्थापना झाली. तेव्हापासून ते कमळावर लढत आले. त्यानंतर पंकजा मुंडे भाजपकडून परळीतून लढत आल्या. शिवसेना-भाजप युतीत ही जागा कायम भाजपकडे राहिली.

आता विधानसभा निवडणुकीसाठी महायुतीत सीटिंग गेटिंगचा फॉर्म्युला ठरलेला आहे. त्यामुळे विद्यमान आमदार ज्या पक्षाचा, त्या पक्षालाच जागा सुटली आहे. या सुत्रानुसार महायुतीतून परळीची जागा राष्ट्रवादी काँग्रेसला सुटली आहे. विद्यमान आमदार धनंजय मुंडे यांनाच अजित पवारांनी पुन्हा संधी दिलेली आहे. त्यामुळे यंदा ईव्हीएमवर कमळ चिन्ह नसेल.