जयश्री थोरातांबाबत खालच्या पातळीची भाषा, नगरमध्ये संताप, वसंत देशमुख पोलिसांच्या ताब्यात

जयश्री थोरातांविरोधात आक्षेपार्ह वक्तव्य करणाऱ्या वसंत देशमुख यांना पोलिसांनी ताब्यात घेतल्याची माहिती आहे. त्यांच्यावर संगमनेर पोलीस ठाण्यात गुन्हा दाखल करण्यात आला होता. वसंतराव देशमुख यांना अटक करावी अशी मागणी थोरात समर्थकांच्या वतीने केली जात होती. ते शनिवार (२६ ऑक्टोबर) पासून फरार होते. पोलीस त्यांच्या मागावर होते. रविवारी अहिल्यानगर स्थानिक गुन्हे शाखेच्या पथकाने वसंत देशमुख यांना पुणे येथून ताब्यात घेतले आहे.

वसंत देशमुख यांनी जयश्री थोरात यांच्याबद्दल केलेल्या वादग्रस्त वक्तव्य नंतर संगमनेर विधानसभा मतदारसंघात तणावाची परिस्थिती निर्माण झाली होती. त्यामुळे स्वतः अहिल्यानगरचे जिल्हा पोलीस प्रमुख राकेश ओला यांनी घटनास्थळी भेट देत संबंध प्रकरणातील आरोपींना अटक करण्यासाठी पथके तयार केली होती.

जयश्री थोरात यांच्यावर केलेल्या आक्षेपार्ह वक्तव्यानंतर गेल्या दोन दिवसांपासून जिल्ह्यात मोठी खळबळ माजलेली होती. हे वक्तव्य करणारे वसंत देशमुख हे फरार होते. पोलीस त्यांचा शोध घेत होते. आता स्थानिक गुन्हे शाखेने त्यांना नगर जिल्ह्याबाहेरुन ताब्यात घेतल्याची माहिती आहे. आता त्यांना लवकरच संगमनेर येथे आणलं जाईल. त्यानंतर त्यांच्यावर गुन्हा दाखल करण्याची प्रक्रिया पूर्ण होईल, अशी माहिती आहे. तसेच, त्यांना न्यायालयासमोर हजर केलं जाण्याची शक्यता आहे.

मी या वक्तव्याचा निषेध करतो – सुजय विखे पाटील

सुजय विखे पाटील यांच्या सभेत ही घटना घडली, त्यांनीही या वक्तव्याचा तीव्र शब्दात निषेध केला आहे. वसंत देशमुखांनी या वक्तव्यानंतर संगमनेर तालुक्यात संतापाची लाट उसळली होती. संतप्त कार्यकर्त्यांनी काही ठिकाणी गाड्यांचीही तोडफोड आणि जाळपोळ केली होती. यानंतर सुजय विखे पाटील यांनी या प्रकरणावर आपली प्रतिक्रिया दिली.

मी जयश्री यांना ताई म्हणून संबोधतो, महिलांचा सन्मान व्हायलाच हवा. भाषणादरम्यान मी त्यांना दोनवेळा थांबवण्याचा प्रयत्न केला पण ते थांबले नाहीत. महायुतीच्या कोणत्याही व्यक्तीचं त्या वक्तव्याशी काहीही संबंध नाही, आम्ही त्याचा निषेध करतो. अशाप्रकारे कोणी नेता बोलत असले, तर त्याला पक्षात ठेवलं जाणार नाही, असं सुजय विखे म्हणाले होते.