ज्याच्या बंडखोरीनं दीड वर्षांपूर्वी सीट पडली; त्यालाच पवारांकडून उमेदवारी; भाजप गोत्यात?

२०१९ मध्ये विधानसभा निवडणुकीत चिंचवडची जागा भाजपच्या तिकिटावर लक्ष्मण जगताप यांनी जिंकली. त्यावेळी अपक्ष लढलेल्या राहुल कलाटे यांनी तब्बल १ लाख १२ हजार २२५ मतं घेतली होती. त्यानंतर राज्यात महाविकास आघाडीचा प्रयोग झाला. २०२३ मध्ये जगताप यांचं निधन झालं. भाजपनं त्यांच्या पत्नी अश्विनी जगताप यांना उमेदवारी दिली. त्यावेळी एकसंध असलेल्या राष्ट्रवादी काँग्रेसनं नाना काटे यांना तिकीट दिलं. त्यांनी ९९ हजार ४३५ मतं घेतली.
पुन्हा ताटातलं वाटीत! मशालीला सर्वप्रथम भिडायला निघालेला भाजप नेता शिंदेंकडे; आज पक्षप्रवेश
मार्च २०२३ मध्ये झालेल्या पोटनिवडणुकीत भाजपच्या अश्विनी जगताप यांनी बाजी मारली. त्यावेळी ठाकरेसेनेत असलेले राहुल कलाटे निवडणूक लढण्यास उत्सुक होते. जागा राष्ट्रवादीकडे असल्यानं पक्ष नेतृत्त्वानं त्यांना अर्ज माघारी घेण्याचे आदेश दिले. पण तरीही कलाटे यांनी बंडखोरी करत निवडणूक लढवली. त्यात त्यांना ४४ हजार ११२ मतं पडली. मविआचे अधिकृत उमेदवार नाना काटे ३६ हजार १६८ मतांनी पराभूत झाले. कलाटेंनी बंडखोरी केली नसती, तर कदाचित जगताप यांचा पराभव झाला असता.

राष्ट्रवादीत फूट पडल्यावर नाना काटे अजित पवारांसोबत गेले. विधानसभा निवडणुकीत चिंचवडची जागा आपल्याला सुटेल अशी आशा त्यांना होती. पण विद्यमान आमदार असलेली जागा भाजपनं राखली. इथून अश्विनी जगताप यांचे दीर शंकर जगताप यांना तिकीट देण्यात आलं. त्यानंतर आता नाना काटे यांनी बंडखोरी करत अपक्ष लढण्याची तयारी सुरु केली आहे. गेल्या निवडणुकीत कलाटे यांच्यामुळे काटे यांचं आदारकीचं स्वप्न धुळीस मिळालं. आता काटेंमुळे कलाटे यांचा पराभव होणार का, अशी चर्चा राजकीय वर्तुळात सुरु झाली आहे.