महायुतीत चाललंय काय? दादांच्या आमदारांविरोधात शिंदेंकडून उमेदवार; हेलिकॉप्टरनं धाडले AB फॉर्म

विधानसभेचे उपाध्यक्ष आणि दिंडोरीचे आमदार नरहरी झिरवळ, देवळालीच्या आमदार सरोज अहिरे यांच्याविरोधात शिंदेंनी दोन उमेदवारांना एबी फॉर्म दिले आहेत. अर्ज दाखल करण्याच्या शेवटच्या दिवशी मुख्यमंत्री शिंदेंनी मुंबईहून त्यांचे सचिव भाऊसाहेब चौधरी यांना एबी फॉर्म घेऊन नाशिकला पाठवलं. चौधरी हेलिकॉप्टरनं नाशिकला आले. त्यांनी दिंडोरी, देवळालीत शिंदेसेनेच्या दोघांना एबी फॉर्म दिले. या घटनेची चर्चा सध्या जिल्ह्यात सुरु आहे.नांदगावात सुहास कांदे वि. सुहास कांदे, शिंदेंच्या आमदाराचे वांदे; भुजबळांचा डाव, सेनेसमोर पेच
मुख्यमंत्री शिंदेंनी दिंडोरीतून माजी आमदार धनराज महाले, तर देवळालीतून माजी तहसीलदार राजश्री अहिरराव यांना उमेदवारी दिलेली आहे. महायुती असताना मुख्यमंत्री एकनाथ शिंदेंनी थेट उपमुख्यमंत्री अजित पवारांच्या उमेदवारांसमोर अखेरच्या दिवशी उमेदवार उतरवल्यानं महायुतीमध्ये नेमकं चाललंय काय, असा प्रश्न निर्माण झाला आहे.
ही काही संगीतखुर्ची नाही! भाजपचा निष्ठावंत अपक्ष लढणार; शिंदेसेनेचा ‘इम्पोर्टेड’ नेता रडारवर
नांदगावात राष्ट्रवादी काँग्रेस आणि भुजबळ कुटुंबांनी केलेल्या राजकारणाला उत्तर म्हणून एकनाथ शिंदेंनी देवळाली, दिंडोरीत चाल खेळल्याची चर्चा आहे. नांदगावातून छगन भुजबळांचे पुतणे समीर यांना निवडणूक लढवायची होती. पण विद्यमान आमदार शिंदेसेनेचे सुहास कांदे असल्यानं नांदगावची जागा सेनेला सुटली. पण त्यानंतर समीर भुजबळ यांनी राष्ट्रवादी काँग्रेसमधील सगळ्या पदांचा राजीनामा देत नांदगावातून अपक्ष उमेदवार म्हणून अर्ज भरला.

शिंदेसेनेचा उमेदवार असताना भुजबळांकडून करण्यात आलेल्या बंडखोरीला उत्तर म्हणून शिंदेंनी देवळाली, दिंडोरीत उमेदवार दिले असल्याची चर्चा राजकीय वर्तुळात सुरु आहे. अर्ज भरण्यास शेवटचे काही तास असताना उमेदवारांना अर्ज मिळाले. त्यामुळे त्यांची काहीशी धावाधाव झाली. उमेदवारी अर्ज मागे घेण्याची मुदत ४ नोव्हेंबर आहे. त्यामुळे पुढील काही दिवसांमध्ये नाशकात आणखी लक्षवेधी घडामोडी घडण्याची शक्यता आहे.