निकालानंतर महाराष्ट्रात नवी आघाडी किंवा युती स्थापन होणार? जागावाटपात मिळाले नव्या समीकरणाचे संकेत

महाविकास आघाडीमधील काँग्रेस, शिवसेना उद्धव ठाकरे आणि शरद पवार यांची राष्ट्रवादी असे ३ पक्ष तर महायुतीमधील भाजप, शिवसेना शिंदे गट आणि अजित पवार यांची राष्ट्रवादी असे ३ पक्ष आहेत. या दोन्ही गटात परस्पर विरोधी मते आणि भूमिका असलेली पक्ष एकत्र आलेत. यामुळेच महाविकास आघाडीतील दोन पक्ष सात मतदारसंघात एमेकांविरुद्ध लढत आहेत. महायुतीमध्ये देखील हीच परिस्थिती आहे. येथे तर भाजपसारखा शिस्तीचा पक्ष देखील काही करू शकला नाही. महायुतीत ५ जागा अशा आहेत येथे युतीतील दोन पक्ष एकमेकांविरुद्ध लढत आहेत.
सांगली पार्ट २ ची जोरदार चर्चा! पुन्हा एकदा लोकसभेमध्ये जे घडले तेच विधानसभेत घडणार का?
आता दोन्ही गटातील पक्षांचा प्रयत्न हाच आहे की ४ नोव्हेंबरपर्यंत बंडखोरांचे अर्ज मागे घेणे. राज्यातील या सर्व राजकारणानंतर २३ नोव्हेंबरला जेव्हा निकाल लागतील त्यानंतर हे ६ पक्ष ज्या गटात आज आहेत तेथेच असतील का याबाबत शंकाच वाटते. निकालानंतर राज्यात एक नवी आघाडी किंवा युती अस्तित्वात येऊ शकते.

राज्यातील २८८ जागांपैकी २८४ जागा महायुतीने वाटून घेतल्या. चार जागा मित्रपक्षांना दिल्या.भाजपने सर्वाधिक १५२ जागांवर उमेदवार उभे केले. तर शिंदेंच्या शिवसेनेने ८० जागा, अजित पवारांना ५२ जागा मिळाल्या. महाविकासमध्ये काँग्रेसने १०१, ठाकरेंच्या शिवसेनेला ९६ जागा तर शरद पवारांना ८७ जागा मिळाल्या. सपा आणि माकपला प्रत्येकी दोन जागा सोडल्या आहेत.

महाविकास आघाडीत काँग्रेस आणि शिवसेनेत ज्यापद्धतीने जागावाटपावरून वाद झाला, ते पाहता निकालानंतर हे दोन्ही पक्ष एकमेकांना किती सहन करतील याबाबत शंकाच वाटते. सांगली, सोलापूर, धाराशिव, यवतमाळ आणि मुंबईत हे दोन्ही पक्ष एकमेकांच्या विरोधात आहेत. काँग्रेस समितीचे प्रभारी रमेश चेन्निथला यांनी कोणतीही मैत्रीपूर्ण लढत होणार नाही असे म्हटले आहे.
उमेदवारी अर्ज भरून झाल्यानंतर महायुती, महाविकास आघाडीची डोकेदुखी वाढली; ७ हजार ९९५ उमेदवारांचे १० हजार ९०५ अर्ज
जागा वाटपावरून दोन्ही पक्षात शेवटच्या दिवसापर्यंत वाद सुरू होता. मतदारसंघावरून इतका वाद होत असेल तर उद्या महाविकास आघाडीचे सरकार स्थापन झाल्यावर काय काय होईल याची फक्त कल्पना केलेली बरी. जर वाद वाढलाच तर स्वतंत्र आघाडी स्थापन होऊ शकते.

अशीच परिस्थिती महायुतीत देखील आहे. मानखुर्द-शिवाजीनगरमधून नवाब मलिक यांच्या उमेदवारीवरून मोठा वाद आहे. येथे शिवसेना, सपा आणि राष्ट्रवादीचे उमेदवार उभे आहेत.

राज्यातील निकालात जर कोणत्याही एका गटाला स्पष्ट बहुमत मिळाले नाही तर घोडेबाजार होणार हे निश्चित. अनेक पक्ष पुन्हा एकदा फुटतील. भाजपमध्ये अजित पवार यांच्या पक्षाबद्दल नाराजी आहे. दुसरीकडे काँग्रेस आणि शिवसेना यांच्यातील वाद सर्वांनी पाहिलाच आहे. राज्यातील काँग्रेस नेतृत्वाला शिवसेनेसोबत जायची इच्छा नाही. त्यामुळे निकालानंतर राज्यात एक नवी आघाडी किंवा युती निर्माण झाली तर आश्चर्य वाटू नये.