…हा तर दोघांच्या कॅरेक्टरवर प्रकाश टाकणारा प्रकार, आर आर पाटलांवरील आरोपावरुन दादा-फडणवीसांना घेरले

जयंत पाटील यांनी एका वृत्तवाहिनीला दिलेल्या मुलाखतीत आर आर पाटील यांच्यावरील आरोपाबद्दल भाष्य केले आहे. ते म्हणाले, एखाद्या माणसाच्या निधनानंतर त्यांच्या बाबतीत गंभीर विधान करणे आणि त्या माणसाला आपली बाजू मांडण्याची संधी न मिळणे हा त्यांच्या अन्याय आहे.
आबा चोख प्रत्युत्तर देण्यात पटाईत होते, आज ते असते तर… अजितदादांच्या आरोपावर रोहित पाटलांची प्रतिक्रिया
‘आर आर पाटील महाराष्ट्रातील लोकप्रिय गृहमंत्री होते आणि त्यांच्या पुढे आलेल्या गोष्टीवर त्यांनी सही केली. तीच सही जर असलेली फाईल सरकार बदलल्यावर ज्यांच्यावर आरोप होते त्यांना बोलावून ती फाईल दाखवली म्हणजे राज्यात चाललंय तरी काय? ज्याच्यावर मी आरोप केले त्यालाच फाईल दाखवायची म्हणजे दोघांच्या कॅरेक्टरवर प्रकाश टाकणारा प्रकार आहे. अशी पद्धत असते का?’ असा सवाल जयंत पाटील यांनी उपस्थित केला आहे.

जयंत पाटील पुढे म्हणाले, अजितदादांना फाईल दाखवली असेल तरी एवढी स्टोरी सांगायची गरज नव्हती. यामुळे देवेंद्र फडणवीसांनाही त्यांनी अडचणीत आणलं आहे. यामुळे दोघं कसे सच्चे मित्र आहेत हे महाराष्ट्राला पुन्हा एकदा कळालं आहे. तसेच वारंवार तिकडे जाऊन शपथ घेण्याचा जो प्रयत्न आहे तो त्याचाच एक भाग आहे असे मला वाटते, असा टोलाही जयंत पाटलांनी लगावला आहे.

अजित पवारांचा आरोप काय?

७० हजार कोटी रुपयांच्या घोटाळ्याचे आरोप झाल्यानंतर कारवाई करण्यासाठी फाईल गृह मंत्रालयाकडे गेली होती. आर. आर. पाटील यांनी माझी खुली चौकशी करावी असं सांगत फाईलवर स्वाक्षरी केली होती. त्यानंतर आम्ही सरकारचा पाठिंबा काढून घेतला आणि पृथ्वीराज चव्हाणांचं सरकार कोसळलं. त्यानंतर राष्ट्रपती राजवट लागतात ती फाईल राज्यपालांकडे गेली. परंतु त्यांनी त्याच्यावर सही केली नाही. मग २०१४ मध्ये सत्तांतर झालं आणि देवेंद्र फडणवीस मुख्यमंत्री झाले आणि नंतर त्यांनी मला घरी बोलावून ती स्वाक्षरी दाखवली होती. हे केसानं गळा कापण्याचे धंदे आहेत राव, असा गंभीर आरोप अजित पवारांनी केला होता.