भाजपच्या विरोधावर नवाब मलिक थेटच बोलले, ‘राष्ट्रवादीची भाजपसोबत केवळ राजकीय अॅडजस्टमेंट, विचारांची नाही!’

नवाब मलिकांच्या उमेदवारीला महायुतीतील घटक पक्षांकडून विरोध होत असताना नवाब मलिकांनी आपली भूमिका स्पष्ट केली आहे. जनतेच्या आग्रहाखातर मी मानखुर्द शिवाजीमधून निवडणुकीच्या रिंगणात उतरलो आहे. भाजप शिंदेसेनेचे उमेदवार सुरेश पाटलांना समर्थन देत आहे. मला भाजपकडून विरोध होत असेल मग आम्हाला काळजी करण्याचं कारणच नाही आणि राहिला प्रश्न भाजपचा तर ‘राष्ट्रवादी काँग्रेसने भाजपसोबत केवळ राजकीय अॅडजस्टमेंट केली आहे. मी किंवा राष्ट्रवादी पक्षाने विचारांशी तडजोड केलेली नाही’

आम्हाला हे अपेक्षितच होतं की मला विरोध केला जाणार, माझ्या मुलीच्या अणुशक्ती नगर विधानसभा मतदारसंघातही काही वेगळी स्थिती नाही. असे असले तरी आम्ही या दोन्ही मतदारसंघातून मोठ्या मताधिक्क्याने जिंकू, असे नवाब मलिकांनी अप्रत्यक्षपणे भाजपवर खोचक टीका केली आहे.

‘आमची विचारधारा स्पष्ट आहे, आमचा धर्मनिरपेक्षता आणि लोकशाही मूल्यांवर विश्वास आहे. आणि राहिला विषय निवडणुकीचा विषय असेल तर स्पर्धा अटीतटीची आहे आणि हे देखील स्पष्ट आहे की महाराष्ट्रातील कोणतंही सरकार अजित पवारांशिवाय बनू शकत नाही आणि ते कधीही विचारांशी तडजोड करत नाहीत, अशी टिप्पणी देखील नवाब मलिकांनी केली आहे. या वक्तव्यामुळे आता राजकारणात कोणता नवा ट्विस्ट येतोय हे पाहणे महत्वाचे असणार आहे.