सरदेसाई चक्रव्यूहात, मातोश्रीच्या अंगणात २०१९ ची पुनरावृत्ती झाल्यास सिद्दीकींचा विजय पक्का?

ठाकरे गटाकडून वांद्रे पूर्व येथून आदित्य ठाकरे यांचे मावस भाऊ वरुण सरदेसाई यांना उमेदवारी देण्यात आली आहे. तर काँग्रेसला रामराम ठोकून उपमुख्यमंत्री अजित पवार यांच्या राष्ट्रवादीत प्रवेश केलेले स्थानिक आमदार झिशान सिद्दीकी मैदानात आहेत. ज्याप्रमाणे आदित्य ठाकरे यांच्यासमोर वरळीत दुहेरी आव्हान आहे. तशीच परिस्थिती वांद्रे पूर्वेलाही आहे.

अमित ठाकरेंच्या माहीम विधानसभा मतदारसंघातील ‘डेब्यू मॅच’ला ठाकरे गटाने महेश सावंत यांना रिंगणात उतरवलं आहे. शिवसेनेचे विद्यमान आमदार सदा सरवणकरही निवडणूक लढण्यावर ठाम असल्यामुळे तिथलीही लढाई तिरंगी आहे. अशातच राज ठाकरेंनी शिवसेनेचा बालेकिल्ला आणि मातोश्रीचं अंगण असलेल्या वांद्रे पूर्वेला ठाकरेंचे भाचे वरुण सरदेसाईंविरुद्धही तगडा उमेदवार उतरवला आहे.

वांद्रे पूर्व मतदारसंघाचा इतिहास काय सांगतो?

२०१५ मध्ये शिवसेनेचे तत्कालीन आमदार प्रकाश (बाळा) सावंत यांचं निधन झाल्यानंतर पोटनिवडणूक लागली होती. त्यावेळच्या अखंड शिवसेनेने बाळा सावंत यांची पत्नी तृप्ती सावंत यांना उमेदवारी दिली. मात्र त्यावेळी काँग्रेसमध्ये असलेले माजी मुख्यमंत्री नारायण राणे त्वेषाने तृप्ती सावंत यांच्याविरोधात उतरले. परंतु जवळपास २० हजारांच्या मताधिक्याने विजयी झाल्या होत्या.
Ravi Raja : दिवाळीत काँग्रेसमध्ये मोठा बॉम्ब फुटला, माजी विरोधीपक्ष नेत्याचा राजीनामा, भाजपात प्रवेश

२०१९ मध्ये काय झालं होतं?

२०१९ च्या विधानसभा निवडणुकीत मात्र शिवसेनेने पोटनिवडणुकीत विजयी झालेल्या तत्कालीन आमदार तृप्ती प्रकाश (बाळा) सावंत यांना तिकीट नाकारलं होतं. त्यांच्याऐवजी (दिवंगत) माजी महापौर विश्वनाथ महाडेश्वर यांना उमेदवारी दिली होती. त्यामुळे नाराज झालेल्या तृप्ती सावंत यांनी बंडखोरी करत अपक्ष उमेदवारी भरली होती. त्यांना भारतीय जनता पक्षाने पाठिंबा दिला होता. शिवसेना आणि भाजपच्या वादाचा फटका बसून काँग्रेस उमेदवार झिशान सिद्दीकी यांना पहिल्याच प्रयत्नात यश मिळालं होतं.
Jayshri Jadhav : काँग्रेसला डबल झटका, आधी रवी राजा, मग विद्यमान आमदारानेही पक्ष सोडला, शिवसेनेत जाहीर प्रवेश

त्याच वादाची पुनरावृत्ती होणार?

असाच काहीसा प्रकार यंदाही होऊ शकतो. बाबा सिद्दीकी यांच्या हत्येनंतर झिशान यांच्याबाबत सहानुभूतीची लाट आहेच. याशिवाय विद्यमान आमदार असल्याने त्यांच्याकडे बळ आहे. तृप्ती सावंत पराभवाचा वचपा काढून आमदारकी परत मिळवण्यासाठी उत्सुक आहेत. यावेळी त्यांना मनसेची ताकद आहे. मात्र सावंत आणि सरदेसाई यांच्यात मराठी मतांचं विभाजन होऊन मुस्लिम समाजाची निर्णायक मतं झिशान यांच्याकडे एकगठ्ठा वळल्यास त्यांच्या विजयाचा मार्ग सुकर होऊ शकतो. परंतु नाव ओळखीचे असले तरी ते नवीन पक्षात आहेत. विशेष म्हणजे तिन्ही उमेदवार आणि त्यांचे पक्ष तुल्यबळ असल्याने तिरंगी लढत चुरशीची होणार हे निश्चित मानले जात आहे.