काटोलमध्ये ‘घड्याळ’ तेच, देशमुख नवे…! सलील देशमुखांसमोर अजित पवार गटाचे आव्हान

यावेळी अनिल देशमुखही नाही आणि घड्याळही नाही, अशी चर्चा रंगली असताना, अनिल शंकरराव देशमुख यांनी उमेदवारी अर्ज दाखल केला. ही जागा भाजपला सुटली असताना, त्यांचे उमेदवार चरणसिंग ठाकूर मैदानात असताना अजित पवार यांच्या राष्ट्रवादीने अनिल देशमुखांना उमेदवारी दिली. म्हणजे यावेळी अनिल देशमुख मैदानात आहेत आणि घड्याळही आहे फरक एवढाच आहे की ‘घड्याळ तेच, वेळ नवी’च्या धर्तीवर देशमुख नवे असे म्हणण्याची वेळ आली आहे.

अनिल वसंतराव देशमुख १९९५ साली काटोलमधून अपक्ष म्हणून ‘चष्मा’ चिन्हावर विजयी झाले. सन १९९९ मध्ये राष्ट्रवादीची स्थापना झाल्यापासून ते सातत्याने घड्याळ चिन्हावर लढत आहेत. २०१४ चा अपवाद वगळता ते विजयी होत आहेत. त्यामुळे काटोलमध्ये ‘घड्याळ’ ओळखीचे चिन्ह झाले आहे. यावेळी ‘घड्याळ’ चिन्ह अजित पवार यांच्या राष्ट्रवादीला मिळाले आहे. तर दुसरीकडे काटोलची जागा महायुतीत भाजपच्या कोट्यात गेली असल्याने काटोलमधील निवडणूक शरद पवारांच्या राष्ट्रवादीची ‘तुतारी’ आणि भाजपचे ‘कमळ’ यांच्यात होईल. यातच आता ही जागा महायुतीत भाजपला गेल्याने ठाकुर यांनी अर्ज दाखल केला. अचानक अजित पवार गटाकडून खास दूताच्या मार्फत एबी फॉर्म पाठविण्यात आला आणि अत्यंत गुप्ततेत अनिल देशमुख यांनी तो दाखल केला. फक्त हे देशमुख म्हणजे ते नव्हते. हे होते अनिल शंकरराव देशमुख.

दादा गटाचे पदाधिकारी संभ्रमात
राष्ट्रवादीत फुट पडल्यानंतर शरद पवार यांच्या विश्वासू शिलेदारांमध्ये अनिल देशमुख अग्रणी आहेत. या खेळीत उपमुख्यमंत्री अजित पवार यांनी तीन निशाणे साधल्याची चर्चा आहे. काकांना शह देण्याचा आणि देशमुख पिता-पुत्रासमोर आव्हान उभे करून भाजपशी आणखी जवळीक साधण्याचा प्रयत्न असल्याचे मानले जात आहे. अजित पवार गटाने सलील देशमुख यांची कोंडी केली आहे. हा सस्पेन्स उघड होताच, प्रचार कुणाचा करायचा, असा संभ्रम दादा गटाच्या पदाधिकाऱ्यांमध्ये निर्माण झाला आहे. यापूर्वीही नामसाधर्म्य असणारे दोन-दोन उमेदवार उभे असतात. बड्या उमेदवाराविरुद्ध बऱ्याचवेळा प्रतिस्पर्ध्याकडून अशी खेळी खेळली जाते. यंदा मात्र, दादांच्या घड्याळाचे ठोके चुकतात की चुकवतात, याची चर्चा जिल्ह्यात सुरू झाली.