“योगी आदित्यनाथ यांनी मुख्यमंत्रिपदाचा राजीनामा द्यावा, नाहीतर त्यांचाही बाबा सिद्दीकी होईल”

योगी आदित्यनाथ यांचा बाबा सिद्दीकी करू असं मेसेजमध्ये म्हटलं आहे. राष्ट्रवादी काँग्रस पक्षाचे नेते बाबा सिद्दीकी यांची १२ ऑक्टोबरला वांद्रे पूर्व येथे तीन हल्लेखोरांनी गोळ्या घालून हत्या केली होती. या हत्येमागे लॉरेन्स बिश्नोई असल्याचं समोर आलं होतं. त्यासोबतच या प्रकरणात पोलिसांनी ८ ते ९ जणांना अटक केली असून अजूनही या प्रकरणाचा तपास सुरू आहे. बाबा सिद्दीकी यांच्या हत्येला एक महिनाही झाला नसताना थेट योगींना जीवे मारण्याची धमकी दिली आहे. त्यामुळे आता धमकी देणाऱ्याचा सिद्दीकींच्या हत्येशी काही संबंध आहे का हे पाहणं महत्त्वाचं ठरणार आहे.

याआधी मार्च महिन्यामध्ये लखनऊमधील महानगर येथील नियंत्रण कक्षामध्ये योगी यांना बॉम्बने उडवून देण्याची धमकी देण्यात आली होती. रात्रीच्या वेळी दहा वाजता ८८८९९९१९१६ या नंबरवरून धमकीचा फोन आला होता. योगींना बॉम्बने उडवलं जाईल, असं धमकी देणाऱ्याने फोन नियंत्रण कक्षातील अधिकाऱ्याला म्हटलं होतं. त्यानंतर अधिकाऱ्यांनी जेव्हा विचारलं कोण बोलत आहे तर समोरून फोन ठेवण्यात आला.

दरम्यान, गेल्या काही दिवसांपासून धमकीचे मेल, फोन आणि मेसेज वाढल्याचं पाहायला मिळालं आहे. आंतरराष्ट्रीय विमान कंपन्यांना बॉम्बच्या धमक्या दिल्या गेल्या आहेत. दोन आठवड्यांमध्ये जवळपास राष्ट्रीय आणि आंतरराष्ट्रीय विमानांना धमक्या आल्या आहेत. मात्र सुरक्षा यंत्रणांनी या धमक्या खोट्या असल्याचं सांगितलं होतं.